A carballeira de Santa Isabel

 

Un dos principais espazos verdes da comarca lucense encóntrase en Outeiro de Rei

Trátase da área recreativa de Santa Isabel, unha carballeira á beira da desembocadura do Ladra no Miño

Dende hai xa uns anos, adoitamos visitala por estas datas, coincidindo coa feira de artesanía ou co Convivio da Cultura Galega

Desta volta, cadrounos a fin de semana da feira, que se celebrou no marco da romaría de Santa Isabel

O tamén coñecido comp Campo de Santa Isabel conta co seu propio caneiro, situado ao carón do desvío de auga para un fermoso muíño

Tamén ten a súa praia fluvial con area natural, xusto á altura do encontro do Miño co seu afluente

O lugar, cunha gran riqueza natural, forma parte da reserva da biosfera Terras do Miño

Sobre estas liñas, vemos unha pupa de libélula completando a súa metamorfose entre a vexetación da ribeira

Tamén se poden ollar parrulos, garzas ou lontras, entre outras especies animais

Tocante á flora, predominan os carballos e as árbores ripícolas, coma os ameneiros ou os freixos

A paraxe merece, por tanto, unha visitiña anual, sobre todo neste tempo en que a natureza se amosa en todo o seu esplendor

A Sala Porta Miñá

Lugo conta cuns cantos museos, algún dos cales figura entre os mellores de todo o país

Pero hai un en particular ao que lle teño especial querenza, posto que paso por diante del varias veces ao día

Refírome á Sala de Exposicións Porta Miñá, que alberga restos arqueolóxicos da época romana atopados en diversos puntos da cidade

A sala encóntrase nun antigo matadoiro situado xunto á Porta Miñá ou do Carme

É dicir, unha das escasas portas romanas que conserva na actualidade a Muralla de Lugo

De aquí partía o decumano, a rúa que atravesaba a urbe de leste a oeste, e a Vía XIX, que ía cara a Braga

De aí que o lugar se convertese nun pequeno museo da romanización, á espera doutro meirande aínda non materializado

A través dos restos expostos nas súas vitrinas, quen o visite pode facerse unha idea de como era a vida cotiá en Lucus Augusti

Amósanse pesos de teares, pezas de bronce como fibelas ou prendedores, anacos de cacharros de olería ou mesmo candís enteiros

Tamén se ensina o que facían cos seus finados aquelas xentes que aquí residiron dende a conquista ata a época tardorromana

Ou as obras de arte en que transformaban o chan coas teselas dos mosaicos descubertos en diferentes xacementos do recinto histórico

A localización privilexiada deste museo propiciou que se completase coa exposición in situ dunha cloaca romana

-A este anexo da Sala Porta Miña decidiron denominalo Sub Aqua Terrae, que se pode traducir como Baixo a Auga da Terra- 

Descuberta nos anos 90, fora construída a finais do s. IV para canalizar as augas sucias, coa mellora para a saúde pública que implicaba

Coma no resto da rede museística municipal ou coma no Museo Provincial de Lugo, a entrada é de balde

Encóntrase na rúa do Carme, de onde parte tamén o Camiño Primitivo dende o centro da cidade cara a Compostela

Así que xa sabes: se buscas na capital do Convento Lucense un espazo de interpretación do mundo galaicorromano, este é o lugar idóneo

Tenerife (II): Loro Parque e Siam Park

 

Ademais de subir ata o Teide e de percorrer as praias, en Tenerife tamén tivemos tempo para ir a varios lugares de visita obrigada

O primeiro que pisamos foi o Siam Park, sito en Costa Adeje, que é un dos maiores e mellores parques acuáticos en funcionamento

Posúe, por exemplo, o récord da piscina coa maior onda artificial do mundo, con catro metros de altura, na denominada Siam Beach

O parque conta cunha vintena de atraccións, a metade delas consistentes en tobogáns de auga

No máis alto, Tower of Power, descéndese dende case 30 metros de altura e atravésase un acuario

Pola súa parte, o tobogán máis longo de todos, Singha, ten case un cuarto de quilómetro de lonxitude

Outra atracción que marca récords é Mai Thai River, que é o río lento máis longo e con maior desnivel que existe

O parque acuático encóntrase na avenida Siam, unha nación con vínculos históricos con Tenerife

A comezos do século XX a illa fora visitada polo príncipe tailandés Mahidol, que quedara impresionado

Hoxe unnha escultura súa adorna o lugar, coa maior colección de edificios de estilo tailandés fóra do país asiático

O Siam Park non só destaca pola arquitectura tradicional tailandesa que lle amosa ao público

Unha exuberante vexetación formada por especies tropicais cobre o parque cun dosel bastante tupido

Outro tanto ocorre no Loro Parque, a matriz do grupo que engloba o Siam Park

Fora creado a inicios dos anos 70 en Puerto de la Cruz por unha familia alemá con máis de 150 papagaios

Dende aquela, multiplicou por dez a súa extensión ata chegar ás 14 hectáreas actuais, onde conviven máis de 400 especies animais

É, xa que logo, un parque zoolóxico moi singular, que naceu especializado nas aves tropicais

Baixo estas liñas, vemos un grupo de grúas coroadas semiocultas entre os troncos dun palmeiral

No corazón do parque encóntrase o edificio que acolle o Loro Show

Trátase dun espectáculo herdeiro daquel co que iniciara a súa andaina hai máis de medio século

Por el desfilan exemplares de distintas especies de cacatúas ou de guacamaios, adestrados ata adquirir certas habilidades

No parque tamén se poden ollar de preto algúns psitácidos

É o caso destes coloridos lóridos, os loriquitos arco da vella

Ao igual que no Siam Park, aquí tamén abundan os tanques con especies acuícolas

De feito, o terceiro e máis novo parque do mesmo grupo é o acuario Poema del Mar, en Gran Canaria

Como novidade, vimos o chamado Coral Kingdom, co maior coral fóra do mar, cuns 8.000 corais e 10.000 peixes

E aquí tamén había aves, con distintas especies de pingüíns a conviviren nun espazo que recordaba o triste comezo de Happy Feet

En contraposición, os tanques con distintos tipos de medusas parecéronnos do máis admirable

Outros espectáculos que gozan dunha gran popularidade, malia seren controvertidos, son os dos mamíferos mariños

Neste senso, o documental Blackfish trata o cativerio das candorcas e, entre outros, conta o caso dun coidador finado no Loro Parque

Pero a controversia que rodea o parque non se limita aos animais mariños

Outros mamíferos, como grandes simios ou felinos, tamén conviven nas súas instalacións

O que comezara como un destino turístico centrado nos papagaios acabou convertido nun zoolóxico en toda regra

Con todo, cabe recoñecer a enorme importancia do labor do Loro Parque na recuperación dalgunhas aves en perigo de extinción