Hai escasos días conmemorabamos o 154 aniversario da proclamación da Comuna de París
O 18 de marzo de 1871, a primeira revolución do proletariado conducía a un goberno obreiro
Varias das últimas obras do autor galego Carlos Meixide xiran arredor deste período histórico
A primeira, Viva a Comuna!, narra o auxe e a caída deste precedente da revolución bolxevique
A partir de feitos reais, recrea os tempos convulsos en que foi deposto o último monarca francés
Foi no marco da guerra francoprusiana, que daría pé á III República e á revolta do pobo parisiense
Os revolucionarios da capital gala eríxense precisamente nos heroes que protagonizan esta novela
A través dunha prosa onde prevalece un fondo espírito humano, desenvólvese toda unha trama coral
O resultado é un monumento de 600 páxinas ao que puido ser e non foi, unha oda aos ideais socialistas
Viva a Comuna! foi publicado por Xerais, pero ten un spin-off editado hai uns meses polo propio autor
Trátase de Tres irmáns, onde varios rapaces que foron testemuñas da revolta relatan as súas vivencias
Así, describen o asañamento co que acabou reprimido un goberno que avogaba pola educación universal
E como o Estado se ocupa de devolverlle á burguesía a xestión dos medios de produción que abandonara
Parte da galería de personaxes, tanto reais como ficticias, da anterior novela histórica volven desfilar ante nós
En particular a poeta anarquista Louise Michel, quen fora condenada a dez anos de desterro en Nova Caledonia
Narradas en primeira persoa, as historias dos seus pupilos resultan conmovedoras, cargadas de valores humanos
É neste libro onde se recoñece en maior medida a prosa meixidiana, co estilo que caracteriza o groso da súa obra
Aínda que se pode entender como continuación de Viva a Comuna!, o certo é que acepta unha lectura independente
No primeiro caso, resulta o colofón perfecto para unha gran novela, a guinda do pastel dunha edificación monumental
No segundo, todo un regalo para as emocións e para o intelecto, que tanto logrará facernos reflexionar como empatizar
Ningún comentario:
Publicar un comentario