30/08/18

Estonia, Letonia e Lituania (III): Vilnius



O último lugar que visitamos na nosa viaxe aos países bálticos foi Vilnius
A capital lituana conquistounos pola súa harmonía e polo seu espírito bohemio
Un dos monumentos máis antigos da cidade é a Torre de Gediminas, levantada no s. XV
Data de cando o país se acababa de cristianizar e ía camiño de ser o estado máis extenso de Europa




As vistas dende a torre son impresionantes, coma as do hotel en que nos aloxabamos
 Preto de onde durmiamos encontrábase a Porta da Aurora, que dá acceso ao recinto histórico
O seu interior alberga unha capela cunha imaxe da virxe moi venerada neste país de tradición católica
Ao pé do arco vendíanse ramiños de flores silvestres que logo eran portados polas crentes por toda a cidade




A rúa principal conduce dende esta porta ata a catedral, a un quilómetro e medio de distancia
Entremedias, son numerosos os monumentos de estilo barroco, sobre todo templos, que se atopan polo camiño




No barrio xudeu homenaxeámonos cuns cepelíns, un prato típico a base de pataca rechea de carne
Tampouco nos puidemos resistir aos encantos dunhas pavlovas engalanadas cunha morea de froitos do bosque




Precisamente este ano Lituania celebra o centenario da súa independencia
Tras séculos de sometemento ao Imperio Ruso, o país volvería ser libre durante uns anos
A súa bandeira, con cores máis propias dun estado subsahariano, coexiste coa histórica, tamén oficial
Unha, a tricolor, representa a república, mentres que a do cabaleiro, chamada Vytis, é o emblema gobernamental




Da outra beira do río, chamado Vilnia, atópase outra república, a de Užupis, creada por artistas
Numerosas esculturas adornan o barrio, ademais de se oíren os sons dos hangs ou das cordas de vellos pianos




De feito, hai uns cantos talleres de creadores asentados na zona
Tamén hai tendas de artesanía, con pezas de liño ou instrumentos musicais
E, por suposto, atractivas terrazas dispostas polo paseo fluvial, onde fixemos parada




Os veciños de Vilnius fan vida no cinto verde da cidade
Gústalles vir para se descalzaren e poñeren os pés en remollo no río




Outro punto de interese na capital lituana é a rúa Literatu ou dos escritores
Trátase dun museo ao aire libre onde se poden atopar pezas artísticas relativas a literatos
Con esta referencia damos por concluída unha viaxe a uns países cun enorme patrimonio histórico e cultural

29/08/18

Estonia, Letonia e Lituania (II): Riga



Deixamos atrás Tallin, atravesamos Estonia e chegamos á veciña Letonia
Alí visitamos a capital do país, Riga, comezando polo impresionante Mercado Central
Consiste nunha serie de antigos hangares de cepelíns alemáns, que albergan milleiros de tendas
No complexo, que está declarado Patrimonio da Humanidade, degustamos saborosos peixes afumados




Un dos principais atractivos desta urbe é o seu rico patrimonio modernista
De feito, está considerada a cidade con máis edificios de estilo art nouveau de todo o mundo
Entre os arquitectos daquela época que desenvolveron a súa obra en Riga destaca Michail Eisenstein




Nalgúns dos edificios deseñados polo pai do famoso cineasta soviético apréciase a influencia da arte precolombina




Á parte dun fermoso barrio modernista, a capital letoa conta cun casco vello moi animado
Nas súas rúas e prazas, decoradas profusamente con ornamentos florais, son frecuentes os concertos




O gato negro, que adorna as fachadas de varios edificios históricos, é un dos símbolos de Riga
Tan característico coma a fachada da catedral protestante ou a torre da tamén luterana igrexa de San Pedro




Actualmente, seguen a realizarse obras curiosas no centro da que é a maior cidade dos países bálticos
O certo é que Riga nos gustou aínda máis cá tamén hanseática Tallin, pero non tanto coma o noso seguinte destino


28/08/18

Estonia, Letonia e Lituania (I): Tallin



Vimos de realizar unha viaxe inesquecible a través dos Países Bálticos
Comezamos na capital estoniana, Tallin, caracterizada polo seu encanto medieval
De feito, aínda conserva algunhas das torres da muralla que rodeaba esta cidade hanseática




O centro da cidade encóntrase na Praza do Consistorio
Aquí celébranse acotío mercados onde se pode atopar artesanía local
As pezas feitas con liño son algúns dos artigos máis demandados polos visitantes





As casas dos gremios ou a vella Torre Redonda son algúns dos principais reclamos de Tallin
A cidade pode presumir tamén de ter a farmacia en activo máis antiga do mundo, aberta dende 1422
Ademais, ten un café do s. XIX, o Maiasmokk, onde se elaboran figuras artesás de mazapán pintadas a man



Ás aforas encóntrase o palacio Kadriorg, erixido por Pedro o Grande de Rusia trala conquista do país




Durante a nosa estadía puidemos tamén degustar algunhas das viandas e beberaxes locais
Tamén nos deu tempo a aprender algúns vocábulos en estoniano, da mesma familia que o finés e o saami
É dicir, nada que ver coas linguas propiamente bálticas, indoeuropeas, que habiamos escoitar nas xornadas seguintes


O paseo do Miño

O do Miño é o paseo fluvial máis longo de todo o cinto verde de Lugo Consta de varios treitos, comprendidos entre as pontes q ue cruzan o p...