O Carme

Neste desconfinamento gradual, en Lugo temos a fortuna de poder ir á aldea no centro da cidade

A escasos metros da muralla romana, e a menos dun quilómetro da casa, podemos visitar o barrio do Carme

Así que aproveitamos para percorrer as súas corredoiras durante os paseos dunha hora que nos permitiron realizar

Cando fai bo tempo, deixámonos perder polos carreiros vetustos do barrio

Trátase dunha extensa área que comunica a rúa do Carme coa ronda do Carme

Por diversas circunstancias, foise zafando da especulación urbanística dos últimos anos

Como resultado, na actualidade está a ser posta en valor como unha zona verde e recreativa

As nogueiras son as árbores que máis abundan no barrio do Carme

Pero neste paraíso verde hai tamén unhas cantas figueiras e moitos sabugueiros

Couselos, celidonias e outras flores poboan os valados deste tramo do Camiño Primitivo

Precisamente neste tempo é cando florecen os sabugueiros

Coas súas flores, maceradas en auga con limóns, fixemos un concentrado

Unha vez fervido con azucre, bótaselle á auga para lle dar un rico sabor a primavera

Despois da a última visita ao Carme cruzamos a Porta do Carme cara ao centro

Ali, nunha terraza de Campo Castelo, degustamos o primeiro refresco en dous meses

E compartimos a ledicia da nosa filla, emocionada por poder tomar, por fin, algo nun bar

Estampas do confinamento

Estas fotos non son da miña autoría, senón que foron realizadas pola miña filla

Fíxoas coa súa propia cámara, un agasallo que soubo aproveitar nas últimas semanas

Desta forma, durante o confinamento estivo a experimentar coa máquina na creación de imaxes

Os xogos de simetrías foron dos máis practicados co aparello

A cámara, que ao mesmo tempo é xoguete, permite multitude de combinacións

A rapaza tamén xogou cos diversos filtros de cores

E, como corresponde á súa idade, non cansou de se autorretratar

As imaxes en negativo deron tamén moito xogo 

En negativo e de todas as formas, os xoguetes tamén foron retratados

As bonecas, coma Arale, son as amigas coas que a nena puido xogar nesta primavera

Os libros tamén foron os seus amigos, fosen Pippi, Harry ou Marcopola os seus protagonistas

A cámara, ademais, permite deformar a faciana das persoas retratadas e engadir moreas de efectos

Coma o resto dos cativos, Selma poderá pasear de novo a partir do luns vindeiro

Será un pouco cada xornada, con tempo de sobra para seguir practicando a fotografía

Esta última estampa do confinamento non foi obra súa, senón dun pai orgulloso da súa pícara

Paisaxes de Lugo (IV)

Como cada ano por estas datas, comparto aquí algunhas paisaxes lucenses que vin nos últimos meses

Todas foron captadas co meu propio móbil, a maioría durante saídas no traballo a diferentes puntos da provincia

Para os que agora estades confinados nos vosos fogares, espero que vos resulte gratificante ollar estas pequenas marabillas

A primeira imaxe corresponde ao encoro de Vilasouto, no Incio, mentres que a de abaixo é no dos Peares, na praia da Cova, no Saviñao

Sobre estas liñas, vemos a bruma sobre o río Fervedoira, en Lugo

Nas coberturas na Mariña tamén aproveitei para realizar fotos do mar

Foi o caso dos cantís do Vicedo ou do faro da illa Pancha, en Ribadeo

Como me fascinan as masas de auga, as fotos dos grandes ríos deste territorio son recorrentes

Non podían faltar os canóns do Sil nin o Miño, antes e despois da corta de ameneiros, ao seu paso por Lugo

Esta foto da Devesa da Rogueira, no Courel, é a máis recente no meu Instragram

E estoutra instantánea do río Neira, xunto á ponte de Covas, en Baralla, a máis antiga

As cerdeiras en flor da Ribeira Sacra, acompañadas de abellas, constitúen un reclamo para a vista

Tal como as múltiples pontes do cinto verde de Lugo, comezando polo viaduto da Chanca, do século XIX

Non quixera rematar este repaso polas imaxes dos últimos doce meses sen compartir fotos coma estas

Son estampas cotiás de vida social ao aire libre no centro de Lugo, coma a Verbena Galega d'Antes ou Campo Castelo