Nas últimas semanas, xa nos albores da primavera, realicei varias andainas pola beira do Miño
Coincidiu tempo calmo, polo que puiden facer unhas cantas fotos do arborado espido e do seu reflexo nas augas
O resultado son imaxes onde as pólas das caducifolias, aínda por agromar en Lugo, teñen a súa réplica ao solpor no espello do río
Quixera aclarar que en ningunha destas estampas se ve o ceo do dereito
É dicir, o firmamento ou está reflectido no curso fluvial ou está invertido, ou ben as dúas cousas á vez
Pero a maioría destas postais do Miño están de lado, postas en vertical
Nelas a metade máis clara é o ceo, mentres que e a máis escura corresponde ao río
O tramo do Miño fotografado comprende neste caso dende Meilán ata As Saamasas
É o que se pode ollar polo carreiro que transcorre en paralelo ao paseo de Ombreiro pola beira do río
Foi este un exercicio de edición fotográfica básica, sen filtro ningún, que deu moito xogo
Concretamente, un xogo de espellos coas pólas do revés a se adentraren nas augas coma se fosen raíces
Ningún comentario:
Publicar un comentario