O parque de PortAventura

 

Aproveitando as vacacións da Semana Santa, visitamos o mellor parque de atraccións da Península

Refírome ao PortAventura World, situado no concello catalán de Vila-seca, á beira da turística Salou

A primeira parte que quixemos coñecer foi a de SésamoAventura

Alí esperábanos unha das poucas atraccións internas do parque, Street Mission

Deunos a benvida en varias linguas, incluída a catalá, o propio Coco en calidade de detective

E nunhas bolboretas saltonas, xunto ao Coco Piloto, voamos dando voltas a base de pedalear

No barrio atravesamos a granxa de Elmo e asistimos a varios espectáculos, coma o de Let's Dance

E na SésamoAventura Station collemos o tren de cercanías que nos levaría ata o outro lado do mundo

O ferrocarril conduciunos ao Far West, onde vimos un voitre que cantaba

Estaba ao carón dun cemiterio rodeado de cactos, xunto ao Labirinto BlackSmith

Tamén fomos nos Wild Buffalos, pasados os Grand Canyon Rapids

E aínda botamos unhas risas, embestindo cos bisontes do salvaxe Oeste

Ao cruzarmos a fronteira, chegamos ao territorio mexicano

Alí había cantinas repletas de xente e un labirinto de espellos do tempo dos maias

Aquí sentímonos coma na casa, posto que nos estabamos a hospedar en El Paso

Trátase do hotel ambientado en México que forma parte do resort do parque, onde fixemos noite durante días

De novo en ruta, viaxamos ata Oriente

Alí visitamos as ruínas de Angkor e xiramos nas tazas de té chinesas

Tamén subimos ás alturas do Himalaia, por onde pasa o Shambhala

Dende aquí admiramos unha paisaxe máis de cantas ofrece o parque

De todas elas, a recreación paisaxística que máis nos prestou foi a da Polinesia

Alí asistimos a un pintoresco espectáculo chamado Aloha Tahití, que nos fixo sentir coma nos mares do Sur

Tamén vimos un de Aves do Paraíso e outro de Magic Bubble, pero o show máis completo de todos foi o de Divas

Nese musical intepretaron e bailaron temas de artistas coma Aretha Franklin, Cher, Lady Gaga, Rihanna ou Raffaella Carrà

Precisamente en Italia está ambientada a parte do parque que pecha máis tarde

Refírome a Ferrari Land, onde conducimos bólidos co logo do cavallino rampante por un auténtico circuíto

Nun país con oito millóns de habitantes como é Cataluña, as nosas amizades pódense contar cos dedos das mans

Aínda así, e por incrible que pareza, por pura casualidade demos coa metade delas no parque, para sorpresa de ambas familias

E ata aquí chegaron as nosas peripecias, visita a Tarragona á parte, durante a viaxe arredor do mundo que supón a estadía en PortAventura