A semana pasada aproveitamos para visitar o centro de Portugal
Partindo do Porto, fomos ata Lisboa, pasando por Aveiro e por Coímbra
Moito mudou a primeira das cidades, que había quince anos que non pisabamos
Vímola máis explotada para o turismo, tanto na Ribeira como para acceder á librería Lello
A Selma, que vía por vez primeira o Porto, encantoulle o funicular
Como tamén lle gustaron as casiñas a raias de cores de Costa Nova, en Aveiro
Pero ela do que di que máis gozou foi do buffet do hotel onde pasamos a primeira noite
No centro de Aveiro puidemos ver as embarcacións turísticas da zona
Semellantes ás rabelas do Porto, proa e popa engalánanse con estampas de corte humorístico
Tamén visitamos a longa praia da Barra, na costa exterior da cidade
Dende Aveiro dirixímonos a Coímbra, coa visita de rigor ao Portugal dos Pequenitos
Como este parque merece un capítulo á parte neste blog, outro día falaremos del máis polo miúdo
Unha das áreas temáticas do parque é a propia cidade de Coímbra
Sobre estas liñas, vemos en miniatura a praza da Universidade que visitamos despois
Tamén vimos a Sé Velha, onde imaxinamos o sancristán da famosa canción a facer das súas
Un dos principais atractivos de Coímbra é o ambiente do centro histórico
Coma noutras cidades lusas, a súa orografía fai que teña costas ao estilo Minas Tirith
Os doces pascuais constitúen outro dos reclamos da urbe
Dende alí fomos xa cara a Lisboa, onde visitamos o castelo de São Jorge
Baixando cara á Alfama, gozamos da música que estaba a tocar unha banda
Logo baixamos nun auténtico tranvía histórico cara ao centro da cidade
Por suposto, o mellor de todo foi ver ilusionada a Selma co paseo no bondinho
Levounos xusto ata a praza da Figueira, á beira mesmo do hotel onde nos hospedamos
Na Baixa, visitamos unha tenda especializada na venda de latas de sardiña
Tratábase de O Mundo Fantástico da Sardinha Portuguesa, con decoración steampunk
Polo demais, gozamos da monumentalidade neoclásica lisboeta, que exemplifica o arco da Vía Augusta
