Estampas do confinamento

Estas fotos non son da miña autoría, senón que foron realizadas pola miña filla

Fíxoas coa súa propia cámara, un agasallo que soubo aproveitar nas últimas semanas

Desta forma, durante o confinamento estivo a experimentar coa máquina na creación de imaxes

Os xogos de simetrías foron dos máis practicados co aparello

A cámara, que ao mesmo tempo é xoguete, permite multitude de combinacións

A rapaza tamén xogou cos diversos filtros de cores

E, como corresponde á súa idade, non cansou de se autorretratar

As imaxes en negativo deron tamén moito xogo 

En negativo e de todas as formas, os xoguetes tamén foron retratados

As bonecas, coma Arale, son as amigas coas que a nena puido xogar nesta primavera

Os libros tamén foron os seus amigos, fosen Pippi, Harry ou Marcopola os seus protagonistas

A cámara, ademais, permite deformar a faciana das persoas retratadas e engadir moreas de efectos

Coma o resto dos cativos, Selma poderá pasear de novo a partir do luns vindeiro

Será un pouco cada xornada, con tempo de sobra para seguir practicando a fotografía

Esta última estampa do confinamento non foi obra súa, senón dun pai orgulloso da súa pícara

Paisaxes de Lugo (IV)

Como cada ano por estas datas, comparto aquí algunhas paisaxes lucenses que vin nos últimos meses

Todas foron captadas co meu propio móbil, a maioría durante saídas no traballo a diferentes puntos da provincia

Para os que agora estades confinados nos vosos fogares, espero que vos resulte gratificante ollar estas pequenas marabillas

A primeira imaxe corresponde ao encoro de Vilasouto, no Incio, mentres que a de abaixo é no dos Peares, na praia da Cova, no Saviñao

Sobre estas liñas, vemos a bruma sobre o río Fervedoira, en Lugo

Nas coberturas na Mariña tamén aproveitei para realizar fotos do mar

Foi o caso dos cantís do Vicedo ou do faro da illa Pancha, en Ribadeo

Como me fascinan as masas de auga, as fotos dos grandes ríos deste territorio son recorrentes

Non podían faltar os canóns do Sil nin o Miño, antes e despois da corta de ameneiros, ao seu paso por Lugo

Esta foto da Devesa da Rogueira, no Courel, é a máis recente no meu Instragram

E estoutra instantánea do río Neira, xunto á ponte de Covas, en Baralla, a máis antiga

As cerdeiras en flor da Ribeira Sacra, acompañadas de abellas, constitúen un reclamo para a vista

Tal como as múltiples pontes do cinto verde de Lugo, comezando polo viaduto da Chanca, do século XIX

Non quixera rematar este repaso polas imaxes dos últimos doce meses sen compartir fotos coma estas

Son estampas cotiás de vida social ao aire libre no centro de Lugo, coma a Verbena Galega d'Antes ou Campo Castelo

Galicia, un relato no mundo

A mostra 'Galicia, un relato no mundo' está a ser a máis visitada do país este inverno

Á súa vez, a escultura 'Santa', de Asorey, é a máis buscada entre as máis de 300 pezas expostas

Non sen razón, posto que esta icona da muller rural galega levaba preto de 70 anos sen pisar a nosa terra

O autor concorrera a un certame en Madrid en 1926 con esta talla e co San Francisco, co que recibira o primeiro premio

A santa emigrou en 1951 ao Uruguai, mentres que o santo dá actualmente a benvida á segunda planta do Museo Provincial de Lugo

Obra doutro escultor cambadés, Narciso Pérez, é este 'Guerreiro Celta' de 1928

Foi cedido polo Museo Provincial de Pontevedra precisamente para dar a benvida á exposición

A escultura inspírase nos guerreiros galaicos que chegaron ata os nosos días, coma este vido dende Lisboa

A peza, esculpida en granito, amosa unha caetra, o escudo redondo característico das hostes da Gallaecia prerromana

Outra das primeiras pezas expostas é a reprodución dun relevo altoimperial descuberto en Anatolia

Nel pódese ler, en caracteres gregos, "Ethnos kallaikon", que literalmente significa "Da nación dos galaicos"

O orixinal forma parte do Sebasteion de Afrodisias, onde tamén se alude a outros países conquistados polos romanos

Na mostra, tanto os máis pequenos coma os maiores poden facer uso das novas tecnoloxías para se situaren no templo helenístico

O recursos tecnolóxicos teñen, de feito, unha grande importancia na mostra

Aprovéitanse, por exemplo, para situar diferentes elementos culturais da antigüidade

Ou para comprender mellor os primeiros mapas en que se fai alusión ao territorio galego

Abaixo, vemos un panel sobre Exeria, a escritora e viaxeira galaicorromana, e mais a súa obra

Outro manuscrito que se pode ollar na mostra é a Biblia Kennicott

Foi rematada na Coruña a finais do século XV, antes da expulsión dos xudeus

E da catedral de Ourense tróuxose esta Santa Mariña atribuída a Cornelis de Holanda

O comisario da mostra, Manuel Gago, alude nunha novela súa a unha talla renacentista moi similar

Refírome a 'O anxo negro', en que tratan de recuperar unha Santa Mariña que foi espoliada na Costa da Morte

Élle pois, de agradecer, o traballo para que pisen solo galego obras coma o Cancioneiro da Vaticana ou o Lebor Gabála

A exposición percorre as diferentes etapas que atravesa a historia do pobo galego

Dá conta do longo reino medieval ou da enorme relevancia das peregrinacións a Compostela

Verbo dos Séculos Escuros, bota luz sobre unha das figuras máis senlleiras, o Conde de Gondomar

Tamén dedica un espazo á inmensa colección de obras de arte que posuían os poderosos condes de Lemos

Do século XIX, amósanse obxectos de importante valor histórico, coma a bandeira do Terzo de Galegos de Bos Aires

Boa parte da mostra trata de explicar o fenómeno da emigración, sobre todo ás Américas

Entre diferentes recreacións, pódense oír algunhas das gravacións máis antigas das músicas da diáspora

Xa no tempo actual, coa ollada posta no futuro, fálase da importancia da lingua para a continuidade do noso propio relato

A exposición poderase visitar no Museo Centro Gaiás da Cidade da Cultura, e de balde, ata o vindeiro 12 de abril, Domingo de Pascua