Cantabria

Esta Semana Santa visitamos Cantabria, fundamentalmente pola costa

A nena, que nunca antes estivera nesas terras, moi ben o pasou durante a viaxe

A primeira parada fixémola en San Vicente de la Barquera, vila cun castelo do século XIII

Por Santander pasamos varios días, nos que puidemos coñecer mellor esta cidade

Visitamos os xardíns de Pereda, onde subimos a un carrusel con dúas plantas de cabaliños

Tamén fixemos o ascenso por unha pasarela mecánica ata a parte alta da cidade

Alí vimos un mercado e un monumento ás queixeiras que pouco ten que ver co de Arzúa

Comprobamos que, en comparación, nas procesións o público asistente era bastante escaso

E, por suposto, tamén puidemos contemplar algúns dos edificios máis senlleiros da capital cántabra

Foi o caso das sedes de Correos e do Banco Santander, da catedral, do casino ou do palacio da Magdalena

Sobre estas liñas, vemos o interior do Mercado Municipal do Leste

Debaixo, o Centro Botín, onde subimos nun ascensor falangueiro para gozar das vistas

Santander é lugar de paso para os viaxeiros dos transbordadores que conectan a cidade coas Illas Británicas

Baixo estas liñas, a vista dende o miradoiro do monte Rubí, no parque de Cabárceno, que merece un capítulo á parte

De Santander fomos ata Santoña, unha vila chá ao pé dun monte nunha península á beira dunhas marismas protexidas

Alí degustamos as famosas anchoas, que os pesqueiros vendían xa envasadas nas súas propias tendas xunto con outras conservas

O noso último destino foi o conxunto histórico-artístico de Santillana del Mar

Nesta vila ancorada varios séculos atrás o principal monumento é a colexiata de Santa Xiana

A pesar das datas, non había demasiada xente, máis que nada grazas ao mal tempo que nos cadrou

Antes de irnos, visitamos o museo da cova de Altamira, ao carón de Santillana

Alí moito aprendemos sobre como vivían os poboadores da zona na Idade de Pedra 

Entramos a ver as reproducións de arte rupestre nunha réplica da cova

Recoñecemos diversos animais pintados na rocha, coma bisontes, cabalos ou cervos

Tamén participamos, no propio museo, nun obradoiro dirixido ás familias con pequechos

Con carbón, con pinturas, con paus ou con plumas, debuxamos e coloreamos coma os artistas das cavernas