O val do Mosela

 

Este verán viaxamos á rexión vinícola alemá de maior produción e máis prestixiosa no ámbito internacional

Dende Coblenza ata Tréveris, percorremos o val do Mosela río arriba, visitando castelos medievais e vilas de conto

Partimos da cidade máis poboada da zona, que precisamente recibe o seu nome da confluencia deste curso fluvial co Rin

En Coblenza visitamos prazas coma a dos Xesuítas ou Am Plan, onde xantamos

Tamén paseamos polos espazos verdes que rodean o centro histórico da urbe, coma a Josef-Görres-Platz

A continuación, démonos un waldbaden, un baño de bosque, de camiño ao castelo de Eltz

Construída a partir do século XII, esta fortaleza xamais foi destruída, permanecendo intacta ata o día de hoxe

E non só iso, senón que ademais pertenceu sempre á mesma familia, durante 34 xeracións, ata chegar ao conde que a posúe actualmente

Caso moi distinto foi o do castelo de Cochem, situado no alto do outeiro que domina a vila máis turística da rexión

Con máis de mil anos de antigüidade, foi propiedade dos condes palatinos, dos emperadores ou dos príncipes electores

As tropas francesas deixárono en ruínas no século XVII, ata que un membro da alta burguesía prusiana o restaurou no XIX

No III Reich, o castelo foi expropiado, e dende os anos 70 é de titularidade municipal, tras serlle mercado ao goberno federal

No teito dunha da sala de paso, o cuarto sobre a última porta, chama moito a atención este obxecto

Trátase dunha lámpada cunha serea e unha cornamenta de cervo, que tamén se encontra no Burg Eltz

Ademais de dar luz e de ser un símbolo de estatus, este tipo de figuras tiñan tamén unha función protectora

As vistas panorámicas dende o Reichsburg resultan arrebatadoras

Por se o patrimonio cultural non fose dabondo, explican tamén que ata aquí chegue xente de todo mundo

Curiosamente, a forma do val por momentos evoca a do Sil, ao que se suma que alí tamén é común a lousa, coma na Ribeira Sacra

Así e todo, dentro do turismo que se despraza ata Cochem, predomina o interno

E boa parte faino a través dos numerosos cruceiros que sucan as augas do Mosela

Outra cousa que nos chamou moito a atención foi esta máquina dispensadora de botellas de viño

Está situada en pleno centro da vila, coa idea de que os turistas adquiran o produto e o leven ao hotel

No noso caso, aloxámonos no Villa Vie, onde gozamos dunhas vistas de luxo tanto ao río coma ao castelo

 

Pero, por difícil que pareza, o noso seguinte destino foi, se cadra, aínda máis espectacular

Refírome a Bernkastel-Kues, unha vila de fábula que está considerada a capital do viño do val do Mosela

De feito, desta subzona era unha botella de riesling que collemos, en concreto da adega Markus Molitor, que estaba realmente bo

Bernkastel-Kues é famosa polas súas casiñas de tramado de madeira

Sobre todo na praza do Mercado, fotoxénica dende calquera recuncho

Pasear polas rúas do recinto histórico deste lugar é case como viaxar no tempo

Aínda cos ollos regalados co stendhalazo, proseguimos río arriba

Dirixímonos cara á capital do val, Tréveris, urbe celta romanizada canda Lugo

No século IV, Augusta Treverum era a cidade máis poboada ao norte dos Alpes

Daquela era coñecida como a segunda Roma, e de feito chegou a ser residencia dos césares

Da época imperial data a monumental Porta Nigra, de 30 metros de altura, declarada Patrimonio da Humanidade

Sobre estas liñas podemos gozar das vistas dende o alto da porta

Nela fora decapitado o bispo galaico Prisciliano, a primeira persoa executada polo cristianismo

Sorprendentemente, nin no propio monumento nin no museo, con entradas á parte, figura mención ningunha a estes feitos históricos

Pero Tréveris non só pode presumir de ser patrimonio mundial pola Porta Nigra

A catedral, a máis antiga do país, tamén forma parte do conxunto monumental distinguido pola UNESCO

E nesta cidade encóntrase tamén a casa natal do filósofo Karl Marx, persoeiro que sentou as bases teóricas do comunismo

Non nos fomos dela sen probar un viño branco, Alba Romana, feito cunha uva chamada elbling, que sabía exactamente igual ca un albariño

Tras varias xornadas remontando o Mosela, no tramo final da viaxe cambiamos de póla

Aproveitamos para coñecer outra importante cidade histórica alemá de orixe romana, Aquisgrán

Na urbe máis occidental de todo o país, xa en Renania do Norte, visitamos a capela palatina de Carlomagno

A partir desa capela da época do Imperio Carolinxio construiuse a catedral

Considerada a máis antiga do norte de Europa sen reconstruír, esta sé tamén é patrimonio mundial

Nunha cidade onde todo semella xirar arredor da figura de Carlomagno houbo tempo para algo máis que a arte carolinxia

Ademais das termas, no centro vimos un pozo con bonecos articulados, e visitamos algunha tenda de manga, anime e merchandising afín

Na cidade máis importante da rexión, Colonia, coñecemos o monumento máis visitado do país

Tras 600 anos de construción, esta catedral gótica chegou a ser, no século XIX, o edificio máis alto do mundo

Desa mesma época data a Heinzelmännchenbrunnen, a fonte dos gnomos

E da capital da Xermania Inferior imos agora á da Superior, Maguncia, por onde tamén pasamos

Na que é a cidade máis poboada de Renania-Palatinado tamém puidemos ver casiñas con tramado de madeira

Arredor da catedral de San Martiño, cuxo interior incluímos na visita, cadrounos un mercado enorme con produtos de todo tipo

Ademais de viaxar a través dos dous estados de Renania, tamén visitamos Hesse

Na urbe máis poboada do Länder, e capital financeira do país, paseamos polo centro histórico

En primeiro lugar dirixímonos ao Römerberg, a praza situada no corazón da zona vella de Fráncfort

Boa parte de canto se pode contemplar na actualidade foi reconstruído tras a II Guerra Mundial

Foi o caso do Römer, que é a casa consitorial dende hai 600 anos, ou a catedral, que tamén visitamos

Na zona nova, percorremos a avenida Zeil, a vía comercial máis transitada da cidade e unha das máis importantes de Alemaña

Durante a nosa estadía en Fráncfort hospedámonos nun rañaceos na beira esquerda do Meno

Tratábase do Main Plaza Tower, duns 90 metros e feito de ladrillo vermello, que contaba cunhas vistas impresionantes

A torre do hotel atópase no barrio de Sachsenhausen, que constitúe unha das principais zonas de ocio de Fráncfort

E falando de lecer, aínda nos queda por relatar as aventuras que vivimos nun dos mellores parques de atraccións de Europa

Pero iso terá que agardar á entrega final desta viaxe polo extremo occidental do país máis poboado da UE e motor económico do continente