De Roma a Capri

Con esta terceira e derradeira entrega rematamos o relato da nosa viaxe por Italia
Abrangue os días que botamos en Roma e mailas visitas a Pompeia e á illa de Capri
Na cidade eterna iniciamos o percorrido realmente noutro país, na Cidade do Vaticano

Visitamos os amplos museos vaticanos, que albergan xoias coma o Laoconte

A Sala Rotonda acolle, pola súa parte, unha bañeira de pórfiro e esculturas romanas

O punto culminante da visita foi a chegada á Capela Sistina, onde non deixan fotografar

Na basílica de San Pedro tamén se poden ver esculturas coma esta Pietà do propio Michelangelo

Ou o Baldaquino de Bernini, forxado en bronce macizo negro, que se encontra xusto baixo a cúpula

Á saída da basílica topámonos con varios membros da pintoresca Garda Suíza

Do Vaticano dirixímonos á Piazza di Spagna, cuxa escalinata estaba a ser rehabilitada

No medio da praza encóntrase unha fonte que tamén é de Bernini, a Fontana della Barcaccia

A continuación visitamos a máis coñecida das fontes barrocas de Roma

Refírome á Fontana di Trevi, un conxunto monumental totalmente cheo de turistas

E nós entre eles, que aproveitamos para contemplar esta marabilla restaurada en 2014

Estímase que cada ano se botan máis de un millón de euros en moedas nesta fonte

Deseguido fomos ver o Panteón de Agripa, erixido no século II polo emperador Hadriano

O templo, que inspirou a arquitectura renacentista, ten uns 43 metros de alto e mais de ancho

Moi preto encóntrase a Piazza Navona, unha das máis importantes da cidade

Outra fonte máis de Bernini adorna o centro deste espazo, xunto cun obelisco exipcio

Aquí probamos o tartufo, un xeado típico de chocolate con anacos de chocolate e mais nata

Logo cruzamos o río Tíber polo Ponte Sisto cara ao Trastévere

O barrio bohemio de Roma foi un dos lugares que máis nos gustaron

Nel devoramos unha riquísima pizza e mais flores de cabaciña con queixo

Na Piazza Venezia contemplamos a Columna de Traxano

Nos seus 30 metros de fuste dáse conta da conquista da Dacia

A escasos metros pódense ollar as ruínas dos foros imperiais romanos

Xusto detrás encóntrase o Monte Palatino, a parte máis antiga desta vella cidade

Nel aínda se ven os restos dos palacios de sucesivos césares que gobernaron o imperio

Un pouco máis adiante vemos o Coliseo, un dos monumentos máis visitados

E detrás do Monte Palatino tamén puidemos contemplar as ruínas do Circo Máximo

Sen mudar de época, diriximonos cara ao sur, ata a beira do Vesuvio

Alí visitamos as ruínas de Pompeia, cidade que ficara soterrada tras unha erupción

As rúas vense tal como quedaron en agosto do ano 79 d.C., incluídos os pasos de peóns

Un dos edificios mellor conservados é un lupanar con camas de pedra

Tamén puidemos ver o interior das termas do foro, elegantemente decoradas

E alguhas das figuras das vítimas da erupción, enterradas baixo o material piroplástico

De Pompeia fomos ata Nápoles, onde collemos un barco en dirección a Capri

A babor viamos a silueta do monte Vesuvio, un volcán que a día de hoxe segue activo

A illa é coñecida polas súas augas dunhas cores entre turquesa e un azul moi característico

As diferentes tonalidades cromáticas son o resultado da pigmentación dunha alga, a posidonia

Tras pasarmos por un buraco nos farallóns, recalamos no porto de Marina Grande

Dende alí subimos nun funicular ata a vila de Capri, asaltada durante séculos polos piratas

Tras botar o día nesta especie de illa de Calipso, despedímonos dela

A volta supuxo tamén o comezo da fin desta viaxe a través da bela Italia 

Un lustro con Selma

Hoxe énos un día de celebración, posto que xa levamos cinco anos coa nosa filla

Neste primeiro de setembro, xoves coma cando naceu, Selma cumpre un lustro de vida

O simpático retrato que se pode contemplar sobre estas liñas é da autoría de Jose, o tío de Marta

Un ano máis, a nena pasou doce meses, verán e inverno, a cabalo entre diversos lugares

Tanto xunto ao Baco de Leiro, en Cambados, coma onda á estatua de María Pita, na Coruña

E a maior parte do tempo en Lugo, onde naceu e onde reside dende aquela e onde vai á escola

Aquí está no colo de Uxía Lambona, que deu un concerto en Lugo tralo Entroido

Abaixo, vese como toca unha batería feita á súa medida na casa duns amigos en Conturiz

Tamén se pode ollar unha imaxe da obra teatral en que participaron Marta e ela o Día das Letras

Aquí vémola cos seus avós cambadeses nas súas vodas de ouro

E abaixo, coa súa avoa coruñesa no Carnaval de Verán de Montealto

Estas outras fotografías corresponden a unha festa en que o pasou moi ben

Os amigos de Semente Lugo facían a presentación do novo colexio en Santa Comba

O verán foi, un ano máis, tempo de troula nos principais festivais musicais

A nena puido, por fin, cumprir o seu soño de acudir aos concertos do San Xoán Pequeniño

Tamén puido asistir aos de Cultura Aberta, aos do Festival do Estío ou á Romaría Cativa de Bonaval

E na Feira das Marabillas puido navegar nun barco viquingo

Foi xusto antes das 'viaxes dos pequeniños' que emprendemos nas vacacións

Nelas visitamos as Fragas do Eume, paseamos por Ferrol ou bañámonos en Fisterra

Aquí temos unha ninfa avistada á beira mesmo do río Eume

A mesma que abaixo posa cun "gnomo" nunha rúa da ferrolá Magdalena

Houbo tamén quen a viu aparecer nas augas da ría de Aldán, nunha visita ao Morrazo

Selma xa pasou a varicela, xusto cando comezaba as vacacións
Como resultado aínda se está a recuperar das marquiñas das postelas
Por tal motivo, a nena tivo que botar todo o verán co torso protexido do sol
Polo demais, goza dunha boa saúde e cada día é máis bulideira e agarimosa