20/09/17

Minho


Neste verán a piques de rematar tivemos ocasión de visitar a rexión de Minho, no norte de Portugal
Como era a primeira incursión da nosa filla no país 'vizinho', chamámoslle a "viagem dos pequeninos"
A nosa primeira parada foi Vila Nova de Cerveira, onde puidemos refrescarnos nun parque á beira do río
Soubemos deste lugar, O Castelinho, grazas á recomendación dos amigos do blog Antonautas na Iagosfera




O parque simula o percorrido do Miño onde exerce de fronteira natural
Na beira dereita encóntranse as vilas galegas e na esquerda, as portuguesas
Ao igual ca nas fontes do Castelinho, en fronte a Vila Nova de Cerveira sitúase Tomiño




Ademais dunha zona acuática, neste "parque do lazer" había outros xogos
Selma puido divertirse neles antes de dirixirnos á capital da provincia, Braga




En Braga vimos a Casa do Passadiço, do século XVI
Tamén a Arcada da Lapa, o edificio máis emblemático da cidade
E fomos onda o Chafariz dos Castelos, a fermosa fonte do Largo do Paço




Braga foi a primeira capital da Galicia altomedieval, do Galliciense Regnum
Así que pasear polas súas rúas é como percorrer parte da nosa propia historia
Baixo estas liñas, solpor no Arco da Porta Nova, monumento nacional do s. XVIII




Tras pasar a noite en Braga, fomos a Guimarães e visitamos o seu castelo
Para a nosa filla, a suba á torre foi un dos momentos inesquecibles da escapada
Alí soubo que o primeiro rei do país, Afonso Henriques, nacera galego e morrera portugués




Logo dirixímonos a Barcelos, onde nos agardaban grandes galos de cores
Alí gozamos das vistas do río Cávado dende as ruínas do Paço dos Condes 




O recinto do mercado de Barcelos, bastante extenso, estaba así de engalanado
Finalmente, o último día fomos cara a Ponte de Lima, outra coidada vila histórica




Gozamos das vistas do río e tralo xantar cruzamos a ponte
Na outra beira do río visitamos o Museu do Brinquedo Português
Tanto nos gustou ese lugar, que lle habemos adicar un capítulo á parte




En certos aspectos, Ponte de Lima lémbranos a vila galega de Allariz
Tamén ten un museo dos xoguetes e celebra un festival internacional de xardíns




Ata finais do mes vindeiro, os visitantes poderán escoller os xardíns que máis lles gusten
Se por Selma fose, había gañar este galeón convertido na súa imaxinación nun barco pirata


12/09/17

Chiang Mai, Chiang Rai



Tras viaxar por media Tailandia, os últimos días pasámolos entre Chiang Rai e Chiang Mai
Foron xornadas de relax, en que gozamos dun merecido descanso entre mercados e templos
Na primeira destas cidades do norte do país ficamos pampos coa tremenda feira que tiñan montada




O mercado semanal de Chiang Rai tiña varios quilómetros de longo
Nel había postos de todo tipo, tanto de moda como de alimentación ou bazares
Alí probamos uns ricos peixes feitos ao instante dunha masa rechea de crema de plátano
(Tamén os hai noutros países asiáticos, coma en Corea ou no Xapón, onde se chaman taiyaki)
Neste feirón oriental tanto podías degustar grilos ou vermes de seda como adquirir unha Arale orixinal




Outro dos grandes atractivos desta cidade é o seu Templo Branco
O Wat Rong Khun é obra do artista tailandés Chalermchai Kositpipat
Tras 20 anos de traballo, prevese que o remate dentro de medio século
No seu interior tanto se pode atopar un Doraemon coma un Harry Potter
Ou un Mestre Yoda, lóxico dada a orientación relixiosa de George Lucas





Tralo paso por Chiang Rai dirixímonos ao noso destino final, a veciña Chiang Mai
Esta cidade, de feito, substituira a outra como capital do reino medieval de Lanna




Un foso e mailos restos dunha muralla rodean aínda o recinto histórico da cidade




Aquí subimos nun funicular para visitar o santuario do monte Doi Suthep
Baixo estas liñas, un dos moitos templos que engalanan o centro da cidade




Chiang Mai é famosa historicamente pola súa artesanía
Nun obradoiro, coñecemos os traballos con casca de ovo
Tamén puidemos ver como pintaban figuras de papel lacado




Outra actividade económica salientable na zona é o cultivo de orquídeas
Dende aquí exportan unha morea de variedades destas flores a todo o mundo
Así que fomos a un invernadoiro e de paso entramos nun xardín de bolboretas tropicais




Tamén vimos uns cantos exemplares de figueiras sagradas
Cando se trata de árbores centenarias, adoitan adornase con fitas de cores




Coma no resto do país, o culto á figura do rei é unha constante tamén presente en Chiang Mai
En canto á educación, semella estar militarizada, cos estudantes a vestiren de uniforme nas escolas




Os mercados nocturnos son do mellor que ofrece o norte de Tailandia
Todas as xornadas hai noites de feira e as ringleiras de postos non dan acabado
As tendas e os restaurantes ambulantes sucédense sen fin rúa tras rúa, praza tras praza




Logo de buscalos por medio país, en Chiang Mai demos cos postos de itim pad
Trátase duns rolos de xeado que se preparan ao instante sobre unha prancha conxelada
Precisamente antes de irme de vacacións realizara un vídeo sobre un local de Foz que os elabora




E deste doce xeito finalizamos unha intensa viaxe a través do país asiático
Xusto o último día coincidiu que Marta e mais eu celebramos quince anos como parella


Barbie, Cine e Moda

  Vimos de ver unha mostra con preto de 200 edicións limitadas da boneca máis famosa do mundo Trátase da exposición 'Barbie, Cine e Moda...