24/12/21

Selma en 2021

 


Este 2021 foi moi especial para a nosa filla, pois acadou os dez anos de idade
Ao longo destes últimos doce meses deu un grande estirón, tanto físico como intelectual
Dende o pasado nadal moito cambiaron as cousas no cole, de onde trae cada vez máis e máis deberes
Tamén mudou o seu tempo libre, afortunadamente cunha apertura gradual respecto ao confinamento dun ano atrás




A medida que transcorreu o inverno, puidemos desprazarnos máis lonxe
Tanto aproveitamos para visitar os avós como para coñecer recunchos lucenses, coma este de Baamonde




E así, chegou timidamente a primavera e puidemos ir case a onde quixeramos




Retomamos, deste xeito, os paseos polo cinto verde de Lugo
E celebramos os maios bailando muiñeiras ou xotas na Tradescola




Puido tamén xogar coas amigas no parque das Saamasas, á beira do Miño




E mais recoller as herbas de San Xoán na contorna do castelo de Narla, en Friol




Tanto camiñamos pola Chanca, xa polo verán, coma pola beira do Neira, en Baralla
E durante as vacacións tanto paseamos polo país coma por Funchal, na illa de Madeira
Baixo estas liñas, vemos a nena nunha rúa do barrio mariñeiro de San Tomé, en Cambados




A nena fixo exercicio, moito, e moi ben o pasou
Foi o caso do día do seu aniversario, que celebrou rodeada de amigas




Os meses pasaron e chegou o outono, coa festa do San Froilán
Un ano máis, visitamos na Coruña a Casa das Ciencias, de onde ten tan bos recordos




E así, tras outra volta arredor do sol, chegamos de novo ao Nadal
Coa esperanza de que o ano vindeiro sexa aínda mellor, desexámosvos unhas boas festas


02/11/21

De Barrantes a Ponte Arnelas



Se o ano pasado percorremos o treito final do Umia, desta volta veremos o tramo que vai de Barrantes a Ponte Arnelas
Son outros 5 km que se veñen sumar aos cinco anteriores se se sae a pé dende Cambados, aos que se engadirá a volta
O itinerario en cuestión parte do merendeiro do Umia e vai pola beira esquerda ata chegar, río arriba, á ponte de Cabanelas




No primeiro treito a ruta discorre entre o río, aínda ancho, e cultivos coma o do millo
Baixo estas liñas, vemos uns remeiros vogando con cadansúa táboa entre a vexetación da ribeira




Na metade do percorrido topámonos co club náutico de Cabanelas
Aquí é onde se encontran as piscinas municipais de Ribadumia, que tamén visitamos




A área recreativa conta ademais cun merendeiro con vistas ao Umia
A partir deste punto, a ruta continúa pola outra beira do río, pola dereita




Ao meu ver, este é o tramo máis vistoso do itinerario, por varias razóns
Para empezar, hai unha maior riqueza de arborado, con diversas especies ripícolas




Ademais, o treito posúe unhas cantas praias fluviais, ideais para se refrescar polo verán




Os areais do traxecto encóntranse nas proximidades de Ponte Arnelas
Aquí o río nada ten que ver xa con aquel que viamos preto da desembocadura




En Ponte Arnelas pasamos por baixo dun arco da ponte que lle dá nome ao lugar
Encóntrase entre Leiro e Baión, parroquias pertencentes a Ribadumia e a Vilanova respectivamente




Ao parecer de orixe medieval, a ponte foi restaurada no século XVI
De feito, conserva un escudo de Filipe II, algo pouco común na contorna
Ata aquí, de forma practicamente ininterrompida dende o esteiro, chega a ruta


Barbie, Cine e Moda

  Vimos de ver unha mostra con preto de 200 edicións limitadas da boneca máis famosa do mundo Trátase da exposición 'Barbie, Cine e Moda...