24/02/10

De Bares a Covas



Este é o faro de Estaca de Bares, no concello de Mañón
Trátase do punto máis septentrional da Península Ibérica
Ate alí fomos hai uns días, xusto no máis cru do inverno
E esta era a vista da illa Coelleira dende o Porto de Bares
-Unha viliña mariñeira ao máis puro estilo de Innsmouth-


A illa encóntrase na boca da agrestísima ría do Barqueiro
Á que corresponden estas postais dende a vila homónima





Deixando atrás as casiñas do Barqueiro, fomos a Viveiro
Aló, na beira oeste da ría atópanse estas illiñas de Covas
Unhas formacións que semellan máis asiáticas ca galegas


Xantamos en Covas mesmo, nun local cun certo encanto
Gustoume o detalle da porta redonda, coma en Hobbiton


Dentro, o mesón fíxose máis interesante, e estaba repleto
Non era de estrañar, tendo en conta como nos conquistaron
Cunha rica papada de porco asada con patacas á panadeira


18/02/10

Mentiras sibilinas


Imos falar de “55 mentiras sobre a lingua galega” (Ed. Laiovento)
Este libro consegue desenmascarar a perversidade máis conspicua
Unha por unha, desmonta ducias de trolas interesadas e mesquiñas
Os prexuízos adoitan resultar evidentes e caen polo seu propio peso
Noutras ocasións, a súa razón de ser é dunha sutileza ben retorcida
É daquela cando hai que destecer, fío a fío, unha rede de falsidades
Unha serie de dogmas gravados a lume nas mentes menos formadas
-Vítimas dunha síndrome de Estocolmo nas que callaron estas ideas-
A análise foi feita por un equipo dirixido por Xosé-Henrique Costas
Entre os científicos, figuran sociólogos e sociolingüístas de prestixio
-Un dos autores é o académico e filólogo Francisco Fernández Rei-
A obra conseguiu ser presentada simultaneamente en todo o mundo
E logrou marcar un fito e ser un referente sobre os eidos diglósicos
Compara o modelo educativo galés, non mellor có galego, co finés
En Finlandia, o sueco e o idioma propio apréndense en todo o país
No que se refire ao caso galego, afonda nas falacias máis comúns
-Nas argucias máis recorrentes nas distintas facetas da vida cotiá-
A plataforma Prolingua publicou un completo resumo na súa web
Un dos aspectos máis interesantes versa sobre a lexislación vixente
Aclárase como a día de hoxe o castelán segue a estar sobreprotexido
Non ten desperdicio como se equipara galegofalante con maleducado
Como se cohibe as persoas para preservar o sistema así establecido
E como se abusa da paciencia propia dos galegos, bos e xenerosos
O libro só custa 8 euriños, así que o recomendo para ampliar miras
E de paso, poder botar por terra mentiras mil e unha veces repetidas
-A verdade, que non se fixese ate agora considéroo unha vergonza-

04/02/10

Licor de xenxibre


Tras un ano de maceración, o resultado foi esta brebaxe
Trátase dun licor de xenxibre destinado a curar todo mal
En particular os da gorxa, dadas as súas características
É unha bebida forte, moi cálida e de sabor concentrado
O propio nome do tubérculo recorda o dun lugar enxebre
Ten algo de topónimo, de nome de aldea galega irredenta
Está feito a base dunha boa augardente branca do Salnés
Ademais de xenxibre, leva canela e mais azucre moreno
Só un par de paus de canela, destinados a matizar o sabor
O xenxibre, brasileiro, resulta picante e de aroma intenso
Mentres que o azucre, de Reunión, edulcora e dálle cor
-O seguinte que empregue será ecolóxico, do Paraguai-
Este é o primeiro licor que fago, e estou contento con el
Así e todo, pódese mellorar, se cadra con máis especias

Barbie, Cine e Moda

  Vimos de ver unha mostra con preto de 200 edicións limitadas da boneca máis famosa do mundo Trátase da exposición 'Barbie, Cine e Moda...