29/05/08

Xogos






Son coma os "ferrero-roxé" na casa de Isabel
Imprescindibles para unha velada inolvidable
-Como nunca se sabe cando se poden presentar os invitados...-
Son a nova xeración de xogos de mesa
O complemento perfecto para un completo día de troula
O primeiro do que tivera noticia fora o "Rummy"
Descubrino nese local social exclusivo que é o bar Lucio
-Cambados, R/Albariño, xunto a un restaurante de 1 estrela Michelín-
Gustar, gustoume dende o principio, mais tardei en xogar ben
Basicamente é coma o "Chinchón", pero con fichas
Logo souben do "Coloretto", por cortesía de Eledhwen e Tury
Trátase de pasalo ben chinchando os rivais
Pero este axiña quedou curto, tras coñecer o "Piko Piko"
Tamén foron Eledhwen e Tury os que me meteron o "gusanillo"
Son dezaseis fichas en catro treitos de catro fichas cada un
Cada treito ten un verme máis que poder picar
E ao final gaña o que ten máis miñocas no seu haber
-Pero, ollo, non é nada fácil-
"Lobo", unha novidade, é outro xogo máis que recomendable
Obtivo en Francia o premio ao mellor novo xogo de mesa
Falando destes pasatempos quero reivindicar a cultura lúdica
Non todo vai ser traballar, mamarse e empaparse de saber
-Non necesariamente por esta orde-
Hai que tratar de xogar máis

23/05/08

A Liga de Athenea


Atenea é a deusa grega da sabedoría
Pero tamén o é da estratexia e da guerra xusta
Fálovos desta deidade porque lle dá nome a unha liga especial para min
Trátase da "Liga de Athenea", integrada case toda por colegas herculinos
Consiste nunha alianza entre varios participantes nun xogo na rede
En concreto o "Ikariam", maquinado polos alemáns Gameforge
Que tamén forxaron o "O-Game" ou o "Battleknight"
-Outros, bastante menos apaixonantes, xogos 'on line'-
No Ikariam partes dunha 'polis' nunha illa da Grecia clásica
E o que tes que facer é facela forte e defendela
Pero para iso é preciso facerse cunha serie de recursos
Aínda que os que poidas mercar non serán de abondo
Polo que finalmente te verás abocado a emprender colonizacións
Terás que montar novas colonias nalgunhas das incontables illas
Ademais, terás que establecer pactos de carácter cultural
-Destinados ó troco de virtuais bens culturais-
E mesmo podes fundar unha alianza ou integrarte nunha xa existente
E aí é onde entra nesta historia a Liga de Athenea
Creo que se trata dun xogo completo
Hai interactividade a través do comercio ou dos pactos culturais
Tamén mediante os acordos diplomáticos que poidas realizar
E opino tamén que o deseño está bastante logrado
Sobre todo comparándoo con outros xogos semellantes
E, como moitos outros, este xogo é de balde
Podería obter puntuación extra por deixar aquí un enlace
Pero como non me parece ético, non o vou facer
Todo sexa por xogar en igualdade de condicións

21/05/08

Baco


Esta é unha representación do deus grego Dionisos
Coñecido na mitoloxía romana como Baco
É a que luzo con orgullo na camiseta do meu equipo de fútbol-sala
-Por ser o nome da cervexería luguesa que nos patrocina-
Porque o culto dionisíaco non quita a actividade deportiva
Recoñezo que nunca me apaixonou o fútbol
-Ver un partido pola tele é algo que me aburre soberanamente-
Pero practicalo en primeira persoa preséntase como algo ben distinto
Non é o mesmo ser un mero espectador que tomar parte de xeito activo
Non se trata só de facer exercicio para estar en forma
-Xa se sabe: "Mens sana in corpore sano"-
Hai un forte compoñente de entretemento na práctica deste deporte
De aí a diferencia que existe entre velo e xogalo na cancha
Co incentivo engadido de participarmos nunha competición
Trátase dunha liga de equipos afeccionados a nivel de Lugo
O meu equipo está formado, sobre todo, por compañeiros de traballo
E competimos co nome de "Cervexería Baco"
Un nome, por outra parte, moi relacionado co pasado da cidade
Quero dicir, tanto castrexo, polo da cervexa, como romano, polo do viño
Incluso se podería definir con estas dúas palabras o noso pasado
O cerne da cultura romanocastrexa da que provimos
-E que se prolongou durante máis de cinco séculos-
O viño e a cervexa que deron de beber aos nosos ancestros
E, ao mesmo tempo, que nos conformaron como sociedade
Que nos axudaron a socializarnos dende sempre
Non é casual, logo, que luza con dignidade esta camiseta
Por todo o que simboliza
Ademais, claro está, do espírito epicúreo e hedonista que encarna

20/05/08

A Cova Céltica



En poucos sitios presta tan ben o licor café
Ou unha cervexa escocesa Gordon/Douglas
-Mágoa que na Coruña teña que usar o coche!-
Fálovos de "A Cova Céltica", o pub folkie do Orzán
Antes, non hai moito, abundaban este tipo de locais
De feito, nos anos 90 naceran tres nesa mesma rúa
Todos ao abeiro do grupo folk Luar na Lubre
Deses, a día de hoxe só queda un
E é este que estás a ver
En cuestión de dous anos pecharon o resto
A primeira taberna que o fixo foi "A Cova Folk"
E seguiulle, nos últimos meses, "A Casa da Lubre"
Este último caso foi o que máis me doeu
Era un pub que frecuentaba, por ser algo máis tranquilo
Soía atenderte Xulio Varela, o intérprete de bouzouki
-Quen mesmo xa coñecía o meu gusto polo Porto-
Pero foi substituído por un impersoal e aséptico café lounge
-A onde imos parar, cara a onde camiña a Humanidade...-
O caso é que o outro día cumpríu dez anos A Cova Céltica
-Que recibe o seu nome da tertulia de Eduardo Pondal-
Así que con tal motivo ofreceron un concerto na taberna
Unha mostra de animada e tradicional música do país
Sons vivos para a gorxa e para os oídos sedentos
O local estaba cheo, polo que espero poder volver
Sempre na compaña dos meus benqueridos amigos ártabros
Por moitos anos máis




15/05/08

O Día da Lingua

Esta é unha versión tecida do escudo galego deseñado por Castelao
Está baseado no dos Mariño, do que se conservan moitos exemplos
Sen ir máis lonxe, hai unha ducia na vila na que nacín
E na que me criaron meus pais monolingües
-Por iso lle teño un especial cariño-
Todo isto vén a conto dunha carencia no calendario:
A do Día da Lingua, esta que aínda fala a maioría
Por suposto, non teño nada en contra do Día das Letras
Pero é que se trata da festa diso: das letras
"Letras Galegas" entendido como da literatura galega
Ou en todo caso como festa do galego escrito
Hoxe por hoxe, a literatura galega pasa por unha idade dourada
Hoxe edítanse máis libros en galego ca nunca
Nunca se escribíu tanto en galego como hoxe en día
Non só libros, senón tamén xornais, revistas, publicacións dixitais
Ou mesmo milleiros de blogs coma este que estás a ler
Non só se trata de apoio ou de uso simbólico
Senón de comunicación no máis estrito sentido
Porque a fin de contas é o que é:
Unha ferramenta de comunicación perfectamente válida
E o que é máis: a natural entre ti e mais eu
Por que? Pois moi sinxelo:
Porque é a lingua propia dos galegos, nin máis nin menos
-Tal como recolle o Estatuto de Autonomía e a propia realidade-
Aínda así, por suposto que hai eivas
Aquí mesmo, Blogspot non me dá a opción que eu quero
Non me permite empregalo no meu idioma á hora de manexalo
Claro que si podo redactar en galego, como é evidente
Pero teño que recorrer ao máis semellante para empregalo
-Que é o portugués, que soa igual segundo se lea-
Pola contra, dá a opción de uso en letón
-Unha lingua con menos falantes e usuarios cá miña-
Este é un exemplo máis de discriminación
Ben sexa por ignorancia, por desidia ou adrede
Como o é que non poidas facer tantas cousas en galego
Desgraciadamente, non se respectan os dereitos lingüísticos
Non se está a respectar o meu dereito a vivir en galego
Os rexistros civís seguen a incumprir a lei
Están obrigados a darche tódolos formularios en galego
-Se os pides, isto debería ser posible dende hai tres anos-
Pero ti non podes casar ou ter un fillo en galego
-Ti non podes aínda facer a túa vida en galego-
Pola sinxela razón de que non dispoñen dos formularios
Pero non é o único eido no que se percibe a marxinación
No ámbito do galego oral tamén se dá
En particular en determinados contornos urbanos
Neste senso, é preciso facer distingos:
Non se dá a mesma situación en Lugo ca na Coruña
En Lugo ninguén vai ser despedido por ser galegofalante
Mentres que na Coruña a situación é ben distinta
Chegue comparar as caixeiras de Carrefour das dúas cidades
En Lugo aténdente en galego por sistema
Na Coruña, pola contra, perderían o posto de traballo
Hai que velar polo respecto aos dereitos lingüísticos
E como non, polo cumprimento da lei
Para evitar que haxa cidadáns de distintas categorías
Cidadáns de primeira e cidadáns de segunda
Por iso penso que un día adicado á lingua non estaría de máis
Eu coido que ben merece un festivo propio, de seu
Quero dicir, adicado expresamente á fala
Á manifestación oral do noso propio idioma
Da lingua propia dos galegos
Da que me aprenderon meus pais cando era neno
Ademais, a quen lle vén mal outra festa máis?

13/05/08

Temas de hoxe


Velaquí un dos meus apartados predilectos de Retranca
Chámase "Temas de hoxe" e é obra de Leandro e de Guitián
O de JR en Palas non é máis ca unha pequena mostra
Outra é a de Robert Smith falando do culto galego á morte
Así como moitos outros personaxes recontextualizados
-Por así dicilo, que do que se trata é de que choque a parodia-
Vese que estes homes o pasan en grande facendo o seu traballo
Tendo en conta ademais que fan o que lles dá a real gana
Non podo sentir máis que envexa sa e rir con eles
Que para escarallarse á risa nunca faltan ganas
-Porque mesmo nos peores momentos se agradece-
Por certo, que o perfil dos autores non ten desperdicio
Pincha aquí á dereita no cadro correspondente
E dálle renda solta á túa imaxinación

08/05/08

Retranca



Falar con segundas buscando a hilaridade
Iso é a retranca, segundo a RAG
-O de R por republicana, algún día-
Pero agora o termo ten un novo significado
É a nova revista galega de humor gráfico
Que xa leva medio ano ao pé do canón
Xa dixera que recibira un premio en Barcelona
O que non sabía era que entregara o galardón...
Nada menos que a S. M. o rei Joan Carles I de Polonia!
Pois si, o premio do público á mellor revista do Saló del Còmic
Xa lin os cinco primeiros números
E con moi boa impresión, por certo
Vale que en comparación con "El Jueves" resulta caro
Pero hai que facer unha serie de puntualizacións
Trae moitas menos páxinas, pero tamén menos palla
De "El Jueves" igual me interesa unha quinta parte
-Sobre todo as páxinas de Pedro Vera ou de Alcázar-
E de "Retranca" interésame case todo
Comezando por Leandro, Guitián ou Kiko da Silva
Seguindo por un non menos luxoso elenco
-Miguelanxo Prado, Xaquín Marín, Siro, Mel, etc.-
O prezo do exemplar é de 2,20 euros
É dicir, trinta céntimos menos que "El Jueves"
Quen dá máis?
Eu, en principio, quedaría coas dúas
-Como prescindir de "Ortega y Pacheco" ou de "Silvio José"?-
Pero postos a escoller...


06/05/08

Viatge a Barcelona: amb Helena, Llito i el drac



Non quixera pechar este capítulo sen unha mención especial



Helena e Llito axudáronnos a comprender mellor a realidade catalá



-Ademais de acollernos e guiarnos polo casco histórico barceloní



E aconsellarnos rutas de interés pola cidade-



Así puidemos descubrir xoias coma o hospital de Sant Pau



-Non tan turístico e, malia todo, Patrimonio da Humanidade-



Puidemos así afondar na rica faciana modernista da Ciutat Comtal



-Park Güell e "drac" incluídos-



E no impresionante pasado gótico, tanto civil como relixioso



A arquitectura é parte fundamental da capital catalá



-O que outras capitais xa quixeran-



Como o é o mar, a luz ou o celo por valorar o propio, non sen razón



En definitiva, descubrimos unha cidade caleidoscópica



Puxante, cosmopolita e aberta ao mundo



Barbie, Cine e Moda

  Vimos de ver unha mostra con preto de 200 edicións limitadas da boneca máis famosa do mundo Trátase da exposición 'Barbie, Cine e Moda...