Descubrir Lugo (I)

Ao longo dos últimos meses realicei unha serie de vídeos divulgativos

Tratábase de dar a coñecer lugares que pagase a pena visitar por Lugo

No primeiro deles recomendaba achegarse ata Santa Olalla de Bóveda

Alí agárdannos uns restos romanos cuxo uso orixinal supón un enigma

Descubrir Lugo (II)

O seguinte monumento que visitamos foi o célebre castro de Viladonga

Aínda que non o pareza, este e o de Bóveda foron coetáneos, no s. IV

-O edificio de Bóveda ergueuse mentres as pallozas estaban habitadas-

Descubrir Lugo (III)

O último punto que aconsellei visitar xa é bastante posterior, do s. XIV

Refírome ao castelo de Pambre, o único que sobreviviu aos Irmandiños

Coma no vídeo anterior, o off remata sinalando especialidades culinarias

Dende o meu punto de vista, este dato non pega co resto da información

Pero é o que hai, posto que eran directrices que debía seguir para facelos

Por outra parte, déboo admitir, nestes non me obrigaron a saír en pantalla

Teño que agradecer tamén que me desen certa liberdade para elixir sitios

Coido que son das mellores localizacións que cabería escoller a tal efecto

Lucus In Noctem

Este traballo, Lucus in Noctem, de War-Sweat, foise gravando ao longo de seis meses

O autor tratou de captar o pulso da cidade tras a caída do sol, e dou fe de que o logrou

O vídeo é un fiel reflexo da trafega de xentes polas rúas, sobre todo nas máis céntricas

Paso a diario pola ronda da Muralla, polo treito que se ve entre os segundos 15 e o 20

E, de paseo ou traballando, por moitos dos lugares que figuran nas súas secuencias

O plano do 101 Viños, na praza do Campo, describe de xeito realista a vida nocturna

Ao igual ca o travelling pola rúa Nova entre os locais de copas a ambas as dúas beiras

O resultado, aínda non querendo, é un vídeo promocional dunha calidade extraordinaria

-De ser feito por encarga, de seguro que non había de saír tan bordado coma saíu este-

Tiveron que ser capturadas dez mil fotografías, das que ao final se desbotaron catro mil

Moitas das infraestruturas e edificacións que aparecen no vídeo non existían hai dez anos

Isto dá idea do impulso que tomou, e de canto mellorou, Lugo ao longo da última década

Fukaeri en Sarou

Velaí a portada da última novela de Antonio Lorenzo Gómez Charlín

En efecto, os botes de cristal conteñen auténticos corazóns de porco

-Realizada por Ramón Herar, anticípalle ao lector o espírito da trama-

Fiel ao seu estilo, o autor do libro non fará concesións á hora de espir

O protagonista, Amador Barrios, é de Sarou, trasunto de Cambados

E aí é onde vemos o propio escritor presentando a súa xa sexta obra

A presentación fíxose ao aire libre, nos xardíns da biblioteca municipal

Á sombra dun soutiño, acompañouno Luís Rei, biógrafo de Cabanillas

Quen suliñou a recomendación da lectura de "La leyenda de Fukaeri"

Trátase dun thriller crepuscular e existencialista, fondamente literario

Ademais de unha xeografía do mal, un mapa do horror e da vinganza

Fukaeri é tamén un personaxe de "1Q84", a novela de Haruki Murakami

A súa lenda fora precedida por "La vida soñada de las sirenas" en 2009

Obra esta outra sobre a que xa departiramos neste blog hai ano e medio

Como daquela, e máis nestas datas, insisto na mágoa pola perda sufrida

A dun autor que, ben seguro, había ser valiosísimo para as nosas letras

O libro, que se pode adquirir por 15 euros, está editado por Cultivalibros

EntoleARTE

A fin de semana pasada acudimos a unha exposición colectiva moi particular
Tratábase de "EntoleARTE", un proxecto de creación artística multidisciplinar
O escenario que lle daba sentido á mostra era o antigo psiquiátrico de Castro
-Un centro que, malia o seu mal estado, deixou de funcionar este mesmo ano-
Entre os máis de oitenta artistas participantes, había uns cantos amigos nosos
É o caso de Carmen Llonín, autora das fotografías que encabezan esta entrada
Ou de Jorge Alba, creador das pinturas murais que se poden ollar aquí abaixo

Un dragón verde e outro encarnado atravesaban todos os recunchos dunha sala
Simbolizaban a liberación das mulleres que permanecían recluídas no seu interior

Outra amiga nosa que colaborou neste evento foi a benquerida Carmen Porteiro
Xunto con Neru Herreros, realizou unha videocreación baseada neste manicomio
Do seu excelente traballo, este vídeo que amoso aquí é tan só un breve fragmento

Couturel

Couturel é o escaparate da artesanía feita por dúas amigas moi creativas
Trátase de deseños orixinais, tanto como pode ser un polbo con mostacho
E é que os seus son traballos con gancho, no dobre sentido da expresión
A especialidade da casa sono os amigurumis, os peluches tecidos a man
Esta técnica forma parte da cultura kawaii, baseada no que resulta riquiño

Con ela confeccionaron tamén este outro boneco, inspirado na serie Bleach
-Representa a Kurosaki Ichigo, o protagonista deste manga e mais anime-

As mascotas de lá ocupan un lugar importante entre estas creacións artesás

Neste apartado, destacan uns coelliños recheos de algodón sintético e tenrura

Para veres ou encargares estes ou outros traballos, pódelos ollar neste blog