As termas romanas

Todo o mundo sabe que en Lugo hai unha muralla construída nos tempos de Roma

Moitos son coñecedores, ademais, de que data do século III e é a que mellor se conserva de todo o mundo

Pero, polas razóns que sexan, semella que pouca xente está ao tanto de que na cidade amurallada hai ademais unhas termas romanas

Algunhas persoas incluso se sorprenden cando se lles fai saber da existencia destes restos tan ben conservados

Máis inda cando descobren que figuran entre os máis temperáns de todo o país e mesmo de toda a antiga Gallaecia

A través dun corredor da época accédese a unha sala onde se expoñen aras votivas

Datan da primeira metade do século I da nosa era e están dedicadas ás ninfas dos ríos

Crese que foron depositadas por diferentes cidadáns en agradecemento pola súa curación

Tamén se pode visitar a sala do forno, cuxa escavación se iniciou en 2013, dous mil anos despois da súa construción

Crese que o complexo, coetáneo á fundación de Lucus Augusti polos romanos, chegou a ocupar 2.500 metros cadrados

As termas romanas de Lugo foron declaradas monumento histórico-artístico en 1931

Pódense visitar, de balde, no balneario da cidade, onde nunca deixaron de aproveitarse as augas termais

Pola beira do Mera

 

Poderiamos chamarlle a última fronteira do cinto verde de Lugo, e non habiamos esaxerar

Falamos do Mera, que desemboca no pai Miño río arriba na beira oposta á cidade amurallada

Parella ao curso fluvial, discorre unha ruta que percorre as parroquias rurais de Orbazai e do Veral

Completala dende o centro urbano e regresar supón unha doada andaina dunha vintena de quilómetros

E dadas as marabillas naturais que se poden atopar, paga a pena poñer un pé tras doutro sen coidar os pasos

Por motivos que explicaremos máis adiante, o camiño parte do Monte Segade, e vai pola beira dereita do rego

Unha das árbores máis recoñecibles deste primeiro treito é un castiñeiro centenario, situado aos pés das escuras augas do Mera

Entre a fauna que podemos atopar polo río figuran familias enteiras de parrulos

Tocante á flora, os carballos das ladeiras altérnanse coas especies propias da ribeira

Neste tempo, ademais, multitude de fentos e algún que outro estalote balizan o carreiro

Recentemente, as pasarelas de madeira do paseo foron renovadas

Falta lles facía, posto que levaban anos en mal estado e mesmo resultaban perigosas

Ao carón dun muíño reconvertido en vivenda hai unha presiña onde a auga permanece estancada

No sendeiro tamén se poden atopar formacións rochosas con paredes de penedos

E incluso algunha que outra praia fluvial oculta entre as cortinas de vexetación tupida

Un dos tramos máis fermosos, xa contra o final, atravesa un prado entre o arborado

O paseo remata na Mera, moi preto da aula da natureza e do centro de recuperación de fauna silvestre do Veral

Aí decidín dar media volta, posto que é onde comeza outra senda, a chamada Ruta das Chousas

Xa no retorno, volvín cruzar o claro antes de atravesar o monte xa na ruta circular do Mera

Completei, deste xeito, a chamada Ruta dos Muíños, que é algo máis curta cá que fixen posto que só chega ata Astariz

Na volta, fun río abaixo ata un valo de pedra que impide continuar pola beira das augas negras do Mera

Pertence ao Muíño do Castro, cuxo peche foi denunciado posto que se supoñía que incumpría a lei de augas

Unha vez rodeado, dirixinme á confluencia co Miño, que río abaixo baña Lugo e cruza o país ata desembocar no mar

Corbal no Mar de Arousa

 

Aproveitando a fin de semana, tivemos a ocasión de admirar en Cambados a exposición 'O Corbal no Mar de Arousa'

Co gallo do seu centenario, reúne un bo feixe de láminas do artista Xosé Conde Corbal, autor de máis de 1.700 gravados

A súa obra goza hoxe de gran popularidade, en gran medida grazas ao seu labor como retratista de persoeiros da Xeración Nós

Entre os intelectuais do século XX retratados polo gravador figuran Castelao, Risco ou o cambadés Cabanillas, reconvertido en icona

Na mostra figuran tamén traballos correspondentes a outras vertentes da obra do autor pontevedrés

É o caso das ilustracións referentes aos pazos de varias comarcas da zona, como por exemplo o de Fefiñáns

Expóñense ademais gravados doutro libro de Conde Corbal, 'O fardel da guerra'

A publicación recolle preto de 90 láminas dedicadas á memoria dos horrores do levantamento fascista

Pero, como o seu propio nome indica, a mostra céntrase nas obras relacionadas coa ría da Arousa, coma esta co porto de Meloxo

Tamén no Grove, unha lámina ilustra as embarcacións á beira do Corgo

A exposición convida ademais a gozar dun diaporama cunha acaída 'Sodade' de Cesária Évora de fondo

Á parte de escenas propias das actividades pesqueira e marisqueira, o mestre do gravado tamén ilustrou a fauna mariña

A homenaxe á obra de Corbal, finado en Vilagarcía en 1999, ten como escenario o pazo de Torrado

Nas salas desta galería municipal da capital do Salnés poderase contemplar a mostra, de balde, ata o vindeiro 18 de xuño