Tenerife (II): Loro Parque e Siam Park

 

Ademais de subir ata o Teide e de percorrer as praias, en Tenerife tamén tivemos tempo para ir a varios lugares de visita obrigada

O primeiro que pisamos foi o Siam Park, sito en Costa Adeje, que é un dos maiores e mellores parques acuáticos en funcionamento

Posúe, por exemplo, o récord da piscina coa maior onda artificial do mundo, con catro metros de altura, na denominada Siam Beach

O parque conta cunha vintena de atraccións, a metade delas consistentes en tobogáns de auga

No máis alto, Tower of Power, descéndese dende case 30 metros de altura e atravésase un acuario

Pola súa parte, o tobogán máis longo de todos, Singha, ten case un cuarto de quilómetro de lonxitude

Outra atracción que marca récords é Mai Thai River, que é o río lento máis longo e con maior desnivel que existe

O parque acuático encóntrase na avenida Siam, unha nación con vínculos históricos con Tenerife

A comezos do século XX a illa fora visitada polo príncipe tailandés Mahidol, que quedara impresionado

Hoxe unnha escultura súa adorna o lugar, coa maior colección de edificios de estilo tailandés fóra do país asiático

O Siam Park non só destaca pola arquitectura tradicional tailandesa que lle amosa ao público

Unha exuberante vexetación formada por especies tropicais cobre o parque cun dosel bastante tupido

Outro tanto ocorre no Loro Parque, a matriz do grupo que engloba o Siam Park

Fora creado a inicios dos anos 70 en Puerto de la Cruz por unha familia alemá con máis de 150 papagaios

Dende aquela, multiplicou por dez a súa extensión ata chegar ás 14 hectáreas actuais, onde conviven máis de 400 especies animais

É, xa que logo, un parque zoolóxico moi singular, que naceu especializado nas aves tropicais

Baixo estas liñas, vemos un grupo de grúas coroadas semiocultas entre os troncos dun palmeiral

No corazón do parque encóntrase o edificio que acolle o Loro Show

Trátase dun espectáculo herdeiro daquel co que iniciara a súa andaina hai máis de medio século

Por el desfilan exemplares de distintas especies de cacatúas ou de guacamaios, adestrados ata adquirir certas habilidades

No parque tamén se poden ollar de preto algúns psitácidos

É o caso destes coloridos lóridos, os loriquitos arco da vella

Ao igual que no Siam Park, aquí tamén abundan os tanques con especies acuícolas

De feito, o terceiro e máis novo parque do mesmo grupo é o acuario Poema del Mar, en Gran Canaria

Como novidade, vimos o chamado Coral Kingdom, co maior coral fóra do mar, cuns 8.000 corais e 10.000 peixes

E aquí tamén había aves, con distintas especies de pingüíns a conviviren nun espazo que recordaba o triste comezo de Happy Feet

En contraposición, os tanques con distintos tipos de medusas parecéronnos do máis admirable

Outros espectáculos que gozan dunha gran popularidade, malia seren controvertidos, son os dos mamíferos mariños

Neste senso, o documental Blackfish trata o cativerio das candorcas e, entre outros, conta o caso dun coidador finado no Loro Parque

Pero a controversia que rodea o parque non se limita aos animais mariños

Outros mamíferos, como grandes simios ou felinos, tamén conviven nas súas instalacións

O que comezara como un destino turístico centrado nos papagaios acabou convertido nun zoolóxico en toda regra

Con todo, cabe recoñecer a enorme importancia do labor do Loro Parque na recuperación dalgunhas aves en perigo de extinción

Tenerife (I): do mar ao volcán

Vimos de pasar a Semana Santa nun paraíso terreal

Percorremos a meirande das Illas Afortunadas, Tenerife

Rodeámola enteira e fomos dende o Teide ata a beira do mar

Aló contemplanos solpores incribles en praias de sonoros pelouros

Estabamos establecidos na babilónica Costa Adeje, xunto á praia de Troya 

Dende alí camiñamos decenas de quilómetros polo paseo marítimo ata Las Américas e outros areais

Ao igual ca nas Rías Baixas, nesa costa o sol ponse no océano

Puidemos así gozar de crepúsculos abraiantes a unha temperatura moi agradable

Ambos concellos, Arona e Adeje, forman un continuum turístico duns 130.000 habitantes fixos que atrae ríos de xentes de todo o mundo

Sobre estas liñas, vemos a escultura dun artista no areal de Troya

Abaixo, as rochas negras de Playa Paraíso, a unha ducia de quilómetros ao norte

O mesmo paseo que une Costa Adeje e Las Américas tamén conduce ata o final de Los Cristianos

Esta é a vila máis importante, co centro neurálxico nunha praia con forma de media lúa abrigada tras o porto

Ademais de percorrer parte da costa a pé, tamén circulamos pola illa en coche

Ao longo de varias xornadas albiscamos o punto máis alto dende diferentes miradoiros

A medida que se sobe, muda a paisaxe, cos piñeiros cada vez máis pequenos e co arume amarelo

O punto máis turístico é, sen dúbida, o Roque Cinchado, situado ao pé do Teide

Baixo estas liñas, vemos esa impresionante roca ergueita que figuraba nos billetes de 1.000 pesetas

Cuns 7.000 metros sobre o leito mariño, o Teide é a maior estrutura volcánica do mundo fóra de Hawaii

Ademais do sendeiro de Roques de García, con restos do antigo cráter, destacan as paisaxes marcianas das Minas de San José

De volta ao nivel do mar, quédannos aínda visitas por contar

Son as que máis lle interesaban a Selma, e o principal motivo polo que nos hospedamos entre Arona e Adeje

No seguinte episodio deste miniserie falaremos dos parques máis famosos e visitados desta illa despois do Teide