Un conto de fadas no castelo de Narla

Vimos de vivir unha experiencia inesquecible no castelo de Narla

Coñecemos os seus moradores, as fadas, os cabaleiros e mailos reis 

Foi grazas a unha visita artellada pola organización Criança Cooperativa

A fortaleza encóntrase en Friol, a uns 25 quilómetros ou 20 minutos de Lugo

Ergueita no século XIII, está situada no lugar da Castronela, na parroquia de Xiá

O propio topónimo fala por si só sobre a orixe moi anterior do asentamento humano

De feito, unha croa rodea toda a edificicación, que á súa vez bordea o río que lle dá nome

A día de hoxe o castelo pertence á Rede Museística Provincial de Lugo

Nada máis chegarmos, unha amable guía comezou a orientarnos polo seu interior

Na corte das bestas soubemos como eran as antigas liteiras

E no interior dunha delas, da meirande, atopamos a raíña do castelo
Lucía unha coroa real e saudaba os plebeos non sen unha disimulada sorpresa

Logo fomos coñecer as ferramentas dos oficios tradicionais

E, como campesiños de outrora, traballamos a terra cunha grade

Xa na primeira planta da fortaleza dirixímonos cara á cociña

Alí agardábanos unha bruxa que parecía preparar apócemas nun pote

Cuns ovos que lles collemos ás pitas fixemos masa para rosquillas

Foi no gran salón do castelo, á calor do lume dunha señorial cheminea

No cuarto das tecedeiras coñecemos unha personaxe máxica

Era unha fada dormente que espertou co rico recendo das rosquillas

Deixamos atrás o salón e pasamos onda unha colección de morteiros

Tamén contemplamos unha morea de lucernas, un escritorio ou unha alcoba

Tamén puidemos ver unha colección de espadas ou de sabres

Era tan ampla que mesmo había unha katana pertencente a un samurai

Nesa mesma sala facía garda un cabaleiro medieval

Ao seu carón encontrábase o acceso a un escuro alxube

Ascendemos a outra planta pola torre e vimos outra colección

Neste caso eran todo tipo de armas de fogo, incluso pequenos canóns

E no último andar ollamos un novo dormitorio, este de maior luxo có anterior

Cando por fin acadamos o alto da torre, celebrámolo con cantos e danzas

Entre as almeas, tivemos ocasión de contemplar os amplos horizontes que domina

De novo na cociña, o rei en persoa ofreceunos os doces que nós mesmos elaboramos

Papamos as rosquillas, que nos souberon, seguimos baixando e saímos ao exterior do castelo

Xogamos por fóra e descubrimos un lique seco de cor amarela

Estaba adherido ás pedras dos muros do lado sur da torre da fortaleza

Cheos de gozo polas vivencias en San Paio de Narla, deixamos aquel lugar

Nas nosas lembranzas, de seguro que ha ser sempre un castelo de conto de fadas

Tan cheo de encanto como soubo captar nesta imaxe un artista chamado Xosema Tensk