A festa do segundo aniversario de Selma

Esta fin de semana celebramos o segundo aniversario de Selma

Fixémolo na cidade natal da súa nai, na compaña dos seus avós

Sobre estas liñas, a nena saca fotos no paseo marítimo da Coruña

Abaixo, está connosco nunha das terrazas da praza de María Pita

Para a súa festa de aniversario, escollemos unha torta moi rica

Levaba varias capas de biscoito, nata e marmelada de amorodo

Comémola na casa dos meus sogros, xunto co meu cuñado, Diego

Á súa autoría corresponden as primeiras cinco fotos que vés de ver

Dous anos con Selma

 

 

Neste primeiro de setembro a nosa filla, Selma, fai dous anos

Como era de esperar, este segundo ano transcorreu máis rápido

Neste tempo, a meniña aprendeu a andar e a correr sen descanso

É máis, mesmo chegou a tornar nun terremoto que nos fixo suar

Malia todo, reconforta oíla ampliar sen presas o seu vocabulario
Escoitala dicir frases coas que expresa curiosidade ou sorpresa

 

Sobre estas liñas, a nena está no colo de meu pai lista para saír

Como foi un inverno difícil, houbo que aproveitar o escaso sol

 

Puido relacionarse ademais con outros pequenos e facer amigos

É o caso de Nica, Sabela, Catuxa, Anxo ou Mailoc, entre outros

 

Ademais de enredar, comer e durmir foron as súas ocupacións

 

 

Coa chegada do verán, Selma puido sacarlle partido ao bo tempo

Así, tivo ocasión de ir á praia ou de darse un baño na súa piscina

 

Pola nosa parte, debemos agradecerlles o seu apoio a tíos e sogros

Grazas a eles, puidemos saír pola noite cos nosos propios amigos

 

Foron pausas nas que, así e todo, tivemos sempre en mente a nena

 

 



Deli

Vimos de visitar o segundo país máis poboado do mundo, a República da India

Iniciamos a viaxe na cidade de Deli, onde se encontra a capital administrativa

Trátase dunha urbe de marcada influencia islámica dende a chegada dos árabes

No corazón do barrio musulmán atopamos o templo de Jama Masjid, do s. XVII

Con capacidade para 25 mil persoas, é unha das maiores mesquitas do mundo

Non en van, estímase que un de cada sete cidadáns indios profesa a fe sunnita

Dirixímonos tamén onda o Qutub Minar, un minarete erguido a finais do s. XII

Cos seus 72 metros de altura, está considerado un dos máis alto do mundo

Ao contrario ca o vello barrio musulmán, Nova Deli amosa amplas avenidas

É o caso do Rajpath, que une os edificios gubernamentais coa Porta da India

Datan da ocupación británica, época na que se estableceu a capital na zona



Tamén entramos a ver o templo de Birla, un referente entre os hindús da cidade

Por último, visitamos o Gurdwara Bangla Sahib, o maior templo sikh de Deli

Esta relixión de orixe punjabi fusiona elementos musulmáns e mais hinduístas

Se no interior recitaban versos do seu libro sagrado, fóra reinaba a paz da noite
Alí ollamos como un gran raposo voador baixaba a beber nas augas do estanque

Os cirrios de Lugo

O cirrio é un paxaro semellante á anduriña, aínda que de maior envergadura

Emigra ata estas latitudes dende finais da primavera ata xa mediado o verán

A maior colonia destas aves no noso país encóntrase nun lugar moi especial

Nada menos que onda un monumento declarado Patrimonio da Humanidade

Esa numerosa colonia de cirrios cría nas paredes da muralla romana de Lugo

Xa que teñen dificultades para emprender o voo dende o chan, non se pousan

Así que están en todo momento a voar polo ceo por riba dos muros lugueses

Son insectívoros incansables, polo que devoran todo bicho que se aproxime

Véxoos a diario a primeira hora da mañá, cando están especialmente activos

De camiño ao traballo, alédanme os amenceres cos sons que os caracterizan

Adoito ir dende a porta do Bispo Odoario ata a de Santiago, pasando pola Miñá

Máis vídeos da Galinha Pintadinha

Meses despois de vermos algúns vídeos de A Galinha Pintadinha, xa coñecemos o repertorio completo
Sonche cancións que, a base de oílas todos os días durante este tempo, acabamos por saber de memoria
Non é de estrañar que este proxecto brasileiro xa superase os 300 millóns de visualizacións en Youtube
Vou repasar aquí algúns dos temas que me parecen máis interesantes, comezando por esta do cangrexo
Roda, roda, roda alude a unha caste de crustáceo de Schrödinger que en potencia é peixe e non é á vez

Non menos interesantes son os vídeos nos que aparece un grupo musical formado por uns cantos bechos
Refírome a As Naftalinas, que interpretan esta simpática cantiga de escarnio e maldizer de A Baratinha
Con versos satíricos como 'A Barata diz que ten un chinelo de veludo/É mentira da barata/Ela ten o peludo'
Tamén figuran nesta outra canción sobre a tenda do Mestre André, onde repasan diversos instrumentos

Como non podía ser doutro xeito, a música xoga un papel importante, coma no caso de Dó Ré Mi Fá
Ou como nesta canción sobre un sapo que non lava o pé, que comeza cun coro de batracios nunha lagoa
A min, particularmente, resultoume rexoubeiro este tema dos indiozinhos que conta cun coro de monos

A Selma, pola súa parte, encantoulle esta outra canción sobre os cadelos, animais que a nena adora
E observo que o gusto é común por este outro vídeo que cabe interpretar como unha oda á infancia

Ademais dos temas que xa comentei, salientaría o da bolboretiña, o dos gatos ou o de lavar as mans
Deixo aquí, tal como figuran nos DVDs, todos os vídeos feitos ata o momento da Galinha Pintadinha
Entre clip e clip, adoitan figurar dúas pitas e mais unha vaca que tamén fan as delicias dos cativos

Máis cervexas amargas

Cada vez son máis as pequenas cervexerías galegas creadas dun tempo a esta parte

Con maior ou menor fortuna, foron sacando ao mercado beberaxes de dispar calidade

No caso de Adegas Menduíña, do Morrazo, elaboran unha excelente Indian Pale Ale

-Chámase "Kamek", coma o que se considera que era o nome prerromano de Cangas-

Fana en colaboración coa cervexeira catalá L'Anjub, que soubo apostar pola artesanía

Co nexo en común da produción artesanal galega, véñense de celebrar unhas xornadas

Nelas participaron varios locais especializados da principal zona de copas da Coruña

Entre eles, algúns aos que son asiduo, como é o caso do Malte ou de A Cova Céltica

Supuxeron a primeira fin de semana da cervexa artesá galega que se celebra na cidade

Xunto con Menduiña, Saramagal e Dama Alaricana foron outros fabricantes presentes

Este foi o cartel das xornadas, cun vaso de cervexa no lugar do cáliz no escudo galego
Sen dúbida, un xeito hábil de reproducir o espírito deste escaparate das nosas cervexas
De carácter moi semellante á Kamek é esta outra beberaxe dun marcado sabor amargo
Co nome de "Leyenda", é a cervexa extra special bitter do fabricante cántabro DouGall's

Outra Indian Pale Ale exquisita é a Punk, que elabora a cervexeira escocesa BrewDog

En canto a esta última que vou mencionar, ten un sabor calidoscópico, rico en matices

É a Belgoo Luppoo, da cervexeira belga La Binchoise, que ten certo regusto a hidromel

A.

O artista catalán Luis Berroy está a expoñer as súas pinturas no auditorio da Arousa

"A." é o nome que leva esta mostra de acrílicos sobre lenzo e de cadros electrónicos

Mediante o emprego de diversas técnicas, pinta sobre láminas para seren impresas

O resultado é dunha calidade excelente, como se pode apreciar nas seguintes fotos

Aquí achego detalles das pinturas electrónicas expostas, coa súa riqueza de texturas

Llito é un vello coñecido neste blog: hai cinco anos xa falaramos dos seus progresos

Agora que está asentado na Arousa, estaremos máis atentos á súa evolución artística