Galicia, un relato no mundo

A mostra 'Galicia, un relato no mundo' está a ser a máis visitada do país este inverno

Á súa vez, a escultura 'Santa', de Asorey, é a máis buscada entre as máis de 300 pezas expostas

Non sen razón, posto que esta icona da muller rural galega levaba preto de 70 anos sen pisar a nosa terra

O autor concorrera a un certame en Madrid en 1926 con esta talla e co San Francisco, co que recibira o primeiro premio

A santa emigrou en 1951 ao Uruguai, mentres que o santo dá actualmente a benvida á segunda planta do Museo Provincial de Lugo

Obra doutro escultor cambadés, Narciso Pérez, é este 'Guerreiro Celta' de 1928

Foi cedido polo Museo Provincial de Pontevedra precisamente para dar a benvida á exposición

A escultura inspírase nos guerreiros galaicos que chegaron ata os nosos días, coma este vido dende Lisboa

A peza, esculpida en granito, amosa unha caetra, o escudo redondo característico das hostes da Gallaecia prerromana

Outra das primeiras pezas expostas é a reprodución dun relevo altoimperial descuberto en Anatolia

Nel pódese ler, en caracteres gregos, "Ethnos kallaikon", que literalmente significa "Da nación dos galaicos"

O orixinal forma parte do Sebasteion de Afrodisias, onde tamén se alude a outros países conquistados polos romanos

Na mostra, tanto os máis pequenos coma os maiores poden facer uso das novas tecnoloxías para se situaren no templo helenístico

O recursos tecnolóxicos teñen, de feito, unha grande importancia na mostra

Aprovéitanse, por exemplo, para situar diferentes elementos culturais da antigüidade

Ou para comprender mellor os primeiros mapas en que se fai alusión ao territorio galego

Abaixo, vemos un panel sobre Exeria, a escritora e viaxeira galaicorromana, e mais a súa obra

Outro manuscrito que se pode ollar na mostra é a Biblia Kennicott

Foi rematada na Coruña a finais do século XV, antes da expulsión dos xudeus

E da catedral de Ourense tróuxose esta Santa Mariña atribuída a Cornelis de Holanda

O comisario da mostra, Manuel Gago, alude nunha novela súa a unha talla renacentista moi similar

Refírome a 'O anxo negro', en que tratan de recuperar unha Santa Mariña que foi espoliada na Costa da Morte

Élle pois, de agradecer, o traballo para que pisen solo galego obras coma o Cancioneiro da Vaticana ou o Lebor Gabála

A exposición percorre as diferentes etapas que atravesa a historia do pobo galego

Dá conta do longo reino medieval ou da enorme relevancia das peregrinacións a Compostela

Verbo dos Séculos Escuros, bota luz sobre unha das figuras máis senlleiras, o Conde de Gondomar

Tamén dedica un espazo á inmensa colección de obras de arte que posuían os poderosos condes de Lemos

Do século XIX, amósanse obxectos de importante valor histórico, coma a bandeira do Terzo de Galegos de Bos Aires

Boa parte da mostra trata de explicar o fenómeno da emigración, sobre todo ás Américas

Entre diferentes recreacións, pódense oír algunhas das gravacións máis antigas das músicas da diáspora

Xa no tempo actual, coa ollada posta no futuro, fálase da importancia da lingua para a continuidade do noso propio relato

A exposición poderase visitar no Museo Centro Gaiás da Cidade da Cultura, e de balde, ata o vindeiro 12 de abril, Domingo de Pascua

O Museo Provincial de Lugo

Un dos lugares da cidade de Lugo de visita obrigada é o Museo Provincial

Xunto coa muralla romana e a catedral, ambos bens mundiais, supón un dos principais reclamos

A súa sede encóntrase nun antigo convento franciscano, do cal se conserva o refectorio ou un claustro do século XV

O museo fora creado na II República co fin de reunir e preservar o patrimonio cultural lucense

Ao quedar pequena a súa localización orixinal, no pazo de San Marcos, foi preciso trasladalo a este convento

No seu claustro exhíbense numerosas aras romanas con inscricións en latín, coas correspondentes transcricións ao romance

A máis famosa destas esculturas dos tempos dos césares é a estela funeraria de Crecente, do século I

Tamén da época de dominación romana datan estes mosaicos descubertos en sucesivas excavacións no centro da urbe

E incluso anteriores á chegada das tropas imperiais son os tesouros galaicos que se amosan no museo

A peza máis valiosa é o coñecido torque de Burela, de case dous quilos de ouro macizo, que fora achado na vila mariñá

Exponse, custodiado coma ningunha outra obra, na planta superior do edificio principal do museo, ao que se accede pola praza da Soidade

A cociña do antigo convento franciscano é outra das salas máis visitadas do museo

Precisamente o fundador da orde, San Francisco, é o que preside o acceso á primeira planta

A talla, de  madeira policromada, fora esculpida hai case cen anos polo artista cambadés Francisco Asorey

Do mesmo escultor é outra figura, tamén tallada en madeira, que se encontra á beira mesmo, denominada 'Ofrenda a San Ramón'

O museo ten tamén unha boa pinacoteca, con obras de pintoras como Maruja Mallo ou Xulia Minguillón

Conta en total cunha trintena de salas, entre elas unha dedicada á cerámica de Sargadelos e outra á arte africana

Foi ampliado nos 90 para acoller exposicións temporais, mais a día de hoxe non lle viña mal unha reforma á parte máis vella

Coma no resto da rede museística provincial, a entrada é de balde, aínda que cómpre ter en conta que os festivos non abre ás tardes

O pazo de Tor, en Monforte, ou o castelo de Narla, en Friol, dos que xa temos falado neste blog, completan a oferta dos museos provinciais

Selma en 2019

Deste ano que agora remata a nosa filla gardará unha morea de lembranzas

Caéronlle uns cantos dentes de leite e pegou un bo estironciño, non só no aspecto físico

Desenvolveu máis aínda a súa empatía e seguiu medrando como persoa cun bo feixe de vivencias

Neste 2019 esta pequena fada subiunos por vez primeira a un escenario para participar nunha obra teatral

Tamén continuou adquirindo coñecementos sobre linguaxe musical e danza tradicional, ademais de baile moderno

No Arde Lucus, Selma volveuse armar coma unha guerreira galaica

E, caracterizada coma unha pequena exploradora, fixemos xuntos rutas a pé

Este ano aprendeu a nadar mellor, tras rematar un curso enteiro de natación

Tamén fixemos unhas cantas viaxes con ela, sobre todo durante as pontes da primavera

Levámola ata Cantabria, onde probou deliciosas anchoas e pintou coma as mulleres das cavernas

E puidemos ir de visita a Salamanca, onde gozou das estupendas vistas das torres e mais da Serra de Francia

Xa en pleno verán, pasamos parte das vacacións cos seus avós ou cos seus tíos e primos

O prato forte do estío chegou cando fomos de viaxe a Copenhague

Alí viu a Sereíña, a Torre Redonda ou o Parque Tívoli, onde quedou marabillada

Antes de empezar o cole, tivo un reencontro cos seus compañeiros

Celebraba o seu oitavo aniversario, nesta ocasión cunha festa de temática científica

As ciencias reveláronse como unha das súas principais paixóns

Así que este curso iniciou unha actividade extraescolar para poder realizar experimentos

Tamén no colexio, unha mala caída xogoulle unha mala pasada e sufriu unha pequena fractura que axiña curou

O peor foi que lle coincidiu co San Froilán, polo que pasou as festas con escaiola e estribeira, privándose dalgunhas das atraccións

Unha vez superado este pequeno mal trago, celebramos con ledicia un Samaín terrorífico

Xa no último mes, acudimos un ano máis ao Culturgal, en Pontevedra, onde nos topamos cos Bolechas

Alí, no medio de tantas propostas culturais, pintáronlle á nena unha sereíña disque ao estilo da Maruxaina de San Cibrao

En Lugo sacáronnos unha foto de familia, co gallo do aniversario da muralla como ben mundial

E, como cada ano por estas datas, a nosa filla puido visitar o poboado de Nadal da praza de María Pita

Mentres compartimos a ilusión de Selma pola chegada do Apalpador, desexámosvos un aínda mellor ano 2020